இந்தியாவின் தொழில் வரைபடத்தில் தமிழ்நாடு புதிய வரலாற்றைப் படைத்துள்ளது. ரிசர்வ் வங்கி (RBI) வெளியிட்டுள்ள 2024-2025-ஆம் ஆண்டிற்கான தொழில் உற்பத்தி மதிப்பீடு அறிக்கையின்படி, உற்பத்தித் துறையில் (Manufacturing Sector) இந்திய மாநிலங்களிலேயே தமிழ்நாடு முதலிடம் பிடித்துள்ளது.
புள்ளிவிவரங்கள் சொல்லும் அசுர வளர்ச்சி (Tamil Nadu Industrial Production Record 2026):
- உற்பத்தி மதிப்பு: தமிழகத் தொழிற்சாலைகளில் உற்பத்தி செய்யப்பட்ட பொருட்களின் மதிப்பு ரூ.9.65 லட்சம் கோடி ஆகும். இது தேசிய அளவில் மிக உயர்ந்த மதிப்பாகும்.
- அதிவேக வளர்ச்சி: கடந்த 2019-ஆம் ஆண்டில் அதிமுக ஆட்சியில் ரூ.5.28 லட்சம் கோடியாக இருந்த உற்பத்தி மதிப்பு, தற்போது 82.6% வளர்ச்சி கண்டுள்ளது.
- வேலைவாய்ப்பு: கடந்த 5 ஆண்டுகளில் சுமார் 1,100 புரிந்துணர்வு ஒப்பந்தங்கள் மூலம் ரூ.12.16 லட்சம் கோடி முதலீடுகள் ஈர்க்கப்பட்டுள்ளன. இதன் மூலம் 36 லட்சம் இளைஞர்கள் மற்றும் பெண்களுக்குப் புதிய வேலைவாய்ப்புகள் உருவாக்கப்பட்டுள்ளன.
- தொழிற்சாலைகளின் எண்ணிக்கை: இந்தியாவில் உள்ள மொத்தத் தொழிற்சாலைகளில் 15.43% தமிழ்நாட்டிலேயே அமைந்துள்ளன.
இந்தச் சாதனையின் பின்னணி:
முதலமைச்சர் மு.க.ஸ்டாலின் தலைமையிலான அரசு பொறுப்பேற்ற பிறகு, சென்னையைத் தாண்டி கோவை, தூத்துக்குடி, மதுரை, கிருஷ்ணகிரி எனப் பரவலாகத் தொழில் முதலீட்டாளர் மாநாடுகள் நடத்தப்பட்டன. முதலமைச்சர் நேரடியாக வெளிநாடுகளுக்குச் சென்று முதலீடுகளை ஈர்த்ததும், 16% வருடாந்திர வளர்ச்சியுடன் இந்தியாவின் மிக வேகமாக வளரும் பெரிய மாநிலமாகத் தமிழ்நாடு உருவெடுக்க முக்கியக் காரணமாக அமைந்துள்ளது.
