காவிரி நீர் மேலாண்மை ஆணையத்தின் 40வது கூட்டம் இன்று (மே 22) டெல்லியில், ஆணையத்தின் தலைவர் எஸ்.கே. ஹால்தர் தலைமையில் நடைபெற்றது. இந்தக் கூட்டத்தில், தமிழ்நாடு அரசு சார்பில் நீர்வளத் துறை செயலாளர் ஜெ. ஜெயகாந்தன், காவிரி தொழில்நுட்பக் குழு தலைவர் ஆர். சுப்பிரமணியம், உறுப்பினர் எல். பட்டாபி ராமன் ஆகியோர் கலந்துகொண்டனர். அத்துடன், கர்நாடகா, கேரளா, புதுச்சேரி மாநில அரசுப் பிரதிநிதிகளும் பங்கேற்றனர்.
இக்கூட்டத்தில், தமிழ்நாடு அரசு தரப்பில் முக்கிய கோரிக்கை முன்வைக்கப்பட்டது. இந்திய வானிலை ஆய்வு மையத்தின் கணிப்பின்படி, தென்மேற்குப் பருவமழை 2025 மே 27 அன்று தொடங்கி, இயல்பைவிட சற்று அதிகமாக இருக்கும் என எதிர்பார்க்கப்படுவதால், வரும் ஆண்டில் தமிழகத்திற்கு ஜூன் மற்றும் ஜூலை மாதங்களில் வழங்கப்பட வேண்டிய நீர் அளவுகளான முறையே 9.19 டி.எம்.சி மற்றும் 31.24 டி.எம்.சி. நீரினை உச்ச நீதிமன்ற ஆணையின்படி கர்நாடகா பில்லிகுண்டுலுவில் உறுதி செய்யுமாறு தமிழகம் சார்பில் வலியுறுத்தப்பட்டது.
தமிழ்நாடு அரசின் இந்தக் கோரிக்கையை ஏற்றுக்கொண்ட காவிரி நீர் மேலாண்மை ஆணையம், உச்ச நீதிமன்றத் தீர்ப்பின்படி ஜூன் மற்றும் ஜூலை மாதங்களுக்கு உரிய தண்ணீரை தமிழ்நாட்டிற்குத் திறந்துவிடுமாறு கர்நாடகாவுக்கு உத்தரவிட்டுள்ளது. காவிரி நீர்ப் பங்கீடு தொடர்பான நீண்டகாலப் பிரச்சினைகளுக்கு மத்தியில், காவிரி நீர் மேலாண்மை ஆணையத்தின் இந்த உத்தரவு, தமிழ்நாட்டின் விவசாயப் பணிகளுக்கு மிகவும் அத்தியாவசியமானதாகக் கருதப்படுகிறது. சரியான நேரத்தில் நீர் திறக்கப்படுவது, குறுவை சாகுபடிக்கு உதவும் என்று எதிர்பார்க்கப்படுகிறது. கர்நாடகா இந்த உத்தரவை எவ்வாறு செயல்படுத்தும் என்பதைத் தமிழ்நாடு எதிர்நோக்கியுள்ளது.
