AI: லடசக்கணக்கில் சம்பளம் தரும் 10 வகையான வேலைகள்

தொழில்நுட்ப உலகம் அதிவேகமாக மாறி வருகிறது. ஐந்து ஆண்டுகளுக்கு முன்பு நாம் கேள்விப்படாத பல வேலைகள், இன்று உலகிலேயே அதிக சம்பளம் வாங்கும் துறைகளாக உருவெடுத்துள்ளன. இதற்கு மிக முக்கியக் காரணம் AI (Artificial Intelligence) எனப்படும் செயற்கை நுண்ணறிவு. “வேலைகள் பறிபோகும்” என்ற அச்சத்திற்கு மத்தியில், ‘வேர்ல்ட் எகனாமிக் ஃபோரம் 2025’ (WEF) போன்ற அமைப்புகள், இந்தத் துறை புதிய பொருளாதாரப் புரட்சியை ஏற்படுத்தும் என்று கணித்துள்ளன. நீங்கள் சரியான திறன்களைக் கற்றுக்கொண்டால், இந்தியாவிலும் சர்வதேச அளவிலும் லட்சக்கணக்கான ரூபாய்களைச் சம்பளமாகப் பெற முடியும்.

1. AI ஏஜென்ட் மேலாளர்கள் (AI Agent Managers)

இன்று பல நிறுவனங்கள் தானியங்கி AI கருவிகளைப் பயன்படுத்துகின்றன. இவை தரவுகளை ஆய்வு செய்வது முதல் அறிக்கைகளைத் தயாரிப்பது வரை அனைத்தையும் செய்கின்றன. இந்த டிஜிட்டல் பணியாளர்கள் சரியாக வேலை செய்கிறார்களா என்பதைக் கண்காணிப்பதே ஏஜென்ட் மேலாளர்களின் பணி. இந்தியாவில் இவர்களுக்கு ரூ.15 லட்சம் முதல் ரூ.30 லட்சம் வரையிலும், அமெரிக்காவில் $1.5 லட்சம் வரையிலும் சம்பளம் வழங்கப்படுகிறது.

2. AI தரவு குறிப்பாளர்கள் (AI Data Annotators)

ஒரு AI மாதிரி சரியாகச் செயல்பட அதற்குத் தரமான தரவுகள் (Data) தேவை. புகைப்படங்கள், வீடியோக்கள் மற்றும் உரைகளைச் சரியாக லேபிளிட்டு, AI-க்கு புரியும்படி மாற்றுவதே இவர்களின் வேலை. இந்தியாவில் ரூ.3 லட்சம் முதல் ரூ.8 லட்சம் வரையிலும், அமெரிக்காவில் $80,000 வரையிலும் சம்பளம் கிடைக்கிறது.

3. AI நெறிமுறையாளர்கள் (AI Ethicists)

AI எடுக்கும் முடிவுகள் சாதி, மதம், இனம் அல்லது பாலின அடிப்படையில் பாரபட்சமாக இருக்கக்கூடாது. இந்த அறநெறிகளை உறுதி செய்யும் நிபுணர்களே நெறிமுறையாளர்கள். இவர்களுக்கு இந்தியாவில் ரூ.22 லட்சம் முதல் ரூ.45 லட்சம் வரை சம்பளம் தர நிறுவனங்கள் தயாராக உள்ளன.

4. AI நிர்வாக நிபுணர்கள் (AI Governance Specialists)

அமைப்புகளின் பாதுகாப்பு, தனியுரிமை விதிகள் மற்றும் சட்ட திட்டங்களை AI பின்பற்றுகிறதா என்பதை இவர்கள் உறுதி செய்வார்கள். பொறுப்பான AI பயன்பாட்டைச் சோதிக்கும் இவர்களுக்கு இந்தியாவில் ரூ.25 லட்சம் முதல் ரூ.50 லட்சம் வரை ஊதியம் கிடைக்கிறது.

5. AI தொடர்பு வடிவமைப்பாளர்கள் (AI Interaction Designers)

மனிதர்கள் சாட்பாட்களிடம் (Chatbots) பேசும்போது அது இயல்பாக இருப்பதை உறுதி செய்வதே இவர்களின் பணி. உளவியல் மற்றும் தொழில்நுட்பத்தைக் கலந்து பயனர் அனுபவத்தை மேம்படுத்தும் இவர்களுக்கு இந்தியாவில் ரூ.18 லட்சம் முதல் ரூ.35 லட்சம் வரை சம்பளம் உண்டு.

6. AI செயல்பாட்டு பொறியாளர்கள் (AI Operations Engineers)

சிக்கலான AI மாதிரிகள் சர்வர்களில் தடையின்றி இயங்குவதை இவர்கள் உறுதி செய்கிறார்கள். தொழில்நுட்பச் சிக்கல்களைச் சரிசெய்யும் இவர்களுக்கு இந்தியாவில் ரூ.20 லட்சம் முதல் ரூ.45 லட்சம் வரை சம்பளம் வழங்கப்படுகிறது.

7. AI தயாரிப்பு மேலாளர்கள் (AI Product Managers)

தொழில்நுட்பக் குழுவிற்கும் வணிகக் குழுவிற்கும் இடையே பாலமாகச் செயல்படுபவர்கள் இவர்கள். ஒரு AI தயாரிப்பு சந்தையில் வெற்றிபெறத் தேவையான உத்திகளை வகுக்கும் இவர்களுக்கு இந்தியாவில் ரூ.30 லட்சம் முதல் ரூ.60 லட்சம் வரை பிரம்மாண்ட சம்பளம் கிடைக்கிறது.

8. மனித-AI ஒத்துழைப்பு நிபுணர்கள் (Human-AI Collaboration Specialists)

எந்த இடத்தில் இயந்திரம் வேலை செய்ய வேண்டும், எப்போது மனிதன் தலையிட வேண்டும் என்பதை இவர்கள் வடிவமைப்பார்கள். பிழைகளைக் குறைப்பதே இவர்களின் நோக்கம். இந்தியாவில் இவர்களுக்கு ரூ.18 லட்சம் முதல் ரூ.35 லட்சம் வரை வாய்ப்புகள் உள்ளன.

9. பிராம்ட் இன்ஜினியர்கள் (Prompt Engineers)

ஜெனரேட்டிவ் AI (ChatGPT, Gemini) போன்ற கருவிகளிடம் இருந்து சரியான பதிலைப் பெற, கேள்விகளை (Prompts) எப்படித் துல்லியமாகக் கேட்பது என்று தெரிந்தவர்கள் இவர்கள். இந்தியாவில் இவர்களுக்கு ரூ.20 லட்சம் முதல் ரூ.50 லட்சம் வரை டிமாண்ட் உள்ளது.

10. AI பாதுகாப்பு ஆய்வாளர்கள் (AI Security Analysts)

AI அமைப்புகள் ஹேக்கர்களால் தாக்கப்படாமல் பாதுகாப்பதே இவர்களின் பணி. தரவு பாதுகாப்பை உறுதி செய்யும் இவர்களுக்குச் சர்வதேச அளவில் மிகப்பெரிய வரவேற்பு உள்ளது.

AI என்பது நமது வேலைகளை அழிப்பதற்கான கருவி அல்ல; அது வேலையின் தன்மையை மேம்படுத்தும் ஒரு கருவி. காலத்திற்கேற்ப புதிய திறன்களை வளர்த்துக்கொண்டால், இந்தத் தொழில்நுட்ப மாற்றம் உங்களுக்கு ஒரு மிகப்பெரிய ஜாக்பாட்டாக அமையும் என்பதில் சந்தேகமில்லை.