செயற்கை நுண்ணறிவுத் துறையில் புரட்சியை ஏற்படுத்திய ChatGPT-ஐ உருவாக்கிய உலகின் முன்னணி நிறுவனமான OpenAI, இந்திய சந்தையில் தனது செயல்பாடுகளைத் தீவிரப்படுத்த புதிய அத்தியாயத்தைத் தொடங்குகிறது. வேகமாக வளர்ந்து வரும் இந்தியாவின் AI சந்தையின் முக்கியத்துவத்தை உணர்ந்து, இந்த ஆண்டு பிற்பகுதியில் தலைநகர் புதுதில்லியில் தனது முதல் இந்திய அலுவலகத்தை அமைக்க OpenAI முடிவு செய்துள்ளது.
இந்த அலுவலகம், இந்தியாவின் தொழில்நுட்ப ஆற்றல், உலகத்தரம் வாய்ந்த டெவலப்பர் சூழல் மற்றும் இந்திய அரசின் வலுவான India AI திட்டத்திற்கு ஆதரவாக அமையும் என எதிர்பார்க்கப்படுகிறது. இது உள்ளூர் டெவலப்பர்கள், வர்த்தகங்கள் மற்றும் கல்வி நிறுவனங்களுடன் OpenAI-யின் உறவை மேலும் வலுப்படுத்தும். இதற்கான நிறுவனப் பதிவு மற்றும் உள்ளூர் ஊழியர்கள் நியமனம் உள்ளிட்ட ஆரம்பகட்டப் பணிகள் ஏற்கனவே தொடங்கப்பட்டுள்ளதாக OpenAI தெரிவித்துள்ளது.
அமெரிக்காவுக்கு அடுத்தபடியாக இந்தியா:
அமெரிக்காவுக்கு அடுத்தபடியாக, ChatGPT-யின் இரண்டாவது பெரிய சந்தையாக இந்தியா உருவெடுத்துள்ளது. கடந்த ஆண்டில், இந்தியாவில் ChatGPT-யைப் பயன்படுத்தும் பயனர்களின் எண்ணிக்கை நான்கு மடங்கு அதிகரித்துள்ளதாக OpenAI கூறுகிறது. மேலும், சர்வதேச அளவில், ஐந்து முன்னணி டெவலப்பர் சந்தைகளில் இந்தியாவும் ஒன்று எனவும், ChatGPT-யை அதிகம் பயன்படுத்தும் மாணவர்களைக் கொண்ட நாடாகவும் இந்தியா திகழ்கிறது.
இந்தியாவில் OpenAI-யின் திட்டங்கள்:
இந்தியாவில் தனது இருப்பை வலுப்படுத்த OpenAI ஏற்கனவே பல நடவடிக்கைகளை எடுத்து வருகிறது. சமீபத்தில், UPI மூலம் ChatGPT Pro சேவைக்கு மாதாந்திர கட்டணம் செலுத்தும் வசதியை அறிமுகப்படுத்தியது. மேலும், இந்திய மொழிகளுக்கான மேம்பட்ட ஆதரவு, மின்னணு மற்றும் தகவல் தொழில்நுட்ப அமைச்சகத்துடன் இணைந்து AI கல்வியறிவுத் திட்டங்களை உருவாக்குதல், மற்றும் OpenAI Academy போன்ற திட்டங்களும் செயல்படுத்தப்பட்டு வருகின்றன. இதுமட்டுமல்லாமல், இந்தியாவில் கல்வி மாநாடு மற்றும் டெவலப்பர் தினத்தை நடத்தவும் OpenAI திட்டமிட்டுள்ளது. இது மாணவர்கள், ஸ்டார்ட்அப்கள் மற்றும் நிறுவனங்களுடன் நெருங்கிய தொடர்பை ஏற்படுத்த உதவும்.
அமைச்சரின் வரவேற்பு:
OpenAI-யின் இந்த முடிவை மத்திய மின்னணு மற்றும் தகவல் தொழில்நுட்பத் துறை அமைச்சர் அஸ்வினி வைஷ்ணவ் வரவேற்றுள்ளார். “டிஜிட்டல் ஏற்பு மற்றும் AI புதுமையாக்கத்தில் இந்தியாவின் தலைமை அதிகரித்து வருவதை இது உணர்த்துகிறது. AI-யின் அடுத்த அலையை வழிநடத்த இந்தியா தனித்துவமான இடத்தில் உள்ளது,” என்று அவர் தெரிவித்தார். மேலும், இந்தியாவின் AI திட்டத்தின் ஒரு பகுதியாக, நம்பகமான மற்றும் உள்ளடக்கிய AI தொழில்நுட்பத்தை உருவாக்கும் சூழலை இந்தியா உருவாக்கி வருவதாகவும், இந்த இலக்கை அடைவதில் OpenAI-யின் பங்கேற்பு வரவேற்கத்தக்கது என்றும் அவர் குறிப்பிட்டார்.
More Read
இந்தியாவுக்கான விரிவாக்கத் திட்டங்கள் வரும் மாதங்களில் விரிவாக அறிவிக்கப்படும் என்றும், நாட்டில் உள்ள திறமையான ஊழியர்களை நியமிக்கும் பணி நடைபெற்று வருவதாகவும் OpenAI கூறியுள்ளது. இந்த அலுவலகம், இந்தியாவின் AI வளர்ச்சிக்கு புதிய உத்வேகத்தை அளிப்பதோடு, உலக அளவில் இந்தியாவின் தொழில்நுட்ப வல்லமையை மேலும் வலுப்படுத்தும் என நம்பப்படுகிறது.
