இன்போசிஸ் நிறுவனம் தனது ஊழியர்களுக்கு எதிர்பாராத விதமாக சராசரியாக 80% செயல்திறன் போனஸை அறிவித்துள்ளது. ஐடி துறை தற்போதைய மந்தமான சூழலில் சிக்கி தவிக்கும் வேளையில், இன்போசிஸ் எடுத்துள்ள இந்த முடிவு பலருக்கும் ஆச்சரியத்தையும், நம்பிக்கையையும் ஏற்படுத்தியுள்ளது. குறிப்பாக, பணி நீக்கங்கள், சம்பள உயர்வு ஒத்திவைப்பு என தொடர்ந்து எதிர்மறையான செய்திகள் வந்து கொண்டிருக்கும் சூழ்நிலையில், இன்போசிஸின் இந்த நடவடிக்கை ஒரு நல்ல மாற்றத்தைக் குறிக்கிறது.
நம்பிக்கையை வளர்த்த இன்போசிஸ்
ஐடி துறையில் தொடர்ந்து நிச்சயமற்ற தன்மை நிலவி வருகிறது. பல நிறுவனங்கள் பணிநீக்கங்களில் ஈடுபட்டுள்ளன. உதாரணத்திற்கு, டாடா கன்சல்டன்சி சர்வீசஸ் (TCS) நிறுவனம் இந்த ஆண்டில் சுமார் 12,000 பணியாளர்களை பணிநீக்கம் செய்ய உள்ளதாக அறிவித்துள்ளது. இது ஊழியர்கள் மத்தியில் ஒருவித அச்சத்தையும், பாதுகாப்பின்மையையும் ஏற்படுத்தியுள்ளது. ஆனால், இந்த கடினமான நேரத்தில், இன்போசிஸ் தனது ஊழியர்களுக்கு போனஸ் அறிவித்திருப்பது அவர்களுக்கு ஒரு நம்பிக்கையை அளித்துள்ளது. இது, ஊழியர்களின் கடின உழைப்புக்கு நிறுவனம் அளிக்கும் அங்கீகாரமாக பார்க்கப்படுகிறது.
சராசரியாக 80% போனஸ்
இன்ஃபோசிஸ் ஏப்ரல்-ஜூன் காலாண்டில் எதிர்பார்த்ததை விட சிறந்த வருவாயை ஈட்டியுள்ளது. இதைத் தொடர்ந்து, ஊழியர்களுக்கு செயல்திறன் அடிப்படையிலான போனஸ் அறிவிக்கப்பட்டுள்ளது. இந்த காலாண்டில் சராசரி போனஸ் விகிதம் 80% ஆக உள்ளது. இது ஜனவரி-மார்ச் காலாண்டில் இருந்த 65% போனஸை விட அதிகமாகும். சில ஊழியர்களுக்கு 89% வரை போனஸ் வழங்கப்பட்டுள்ளது. இந்த போனஸ் தொகையானது அவர்களின் தனிப்பட்ட செயல்திறன் மற்றும் நிறுவனத்திற்கு அளித்த பங்களிப்பின் அடிப்படையில் மாறுபடும்.
More Read
யாருக்கு எவ்வளவு?
இன்போசிஸில் உள்ள 3.23 லட்சம் ஊழியர்களில் பெரும்பாலானோர் PL4, PL5 மற்றும் PL6 ஆகிய நிலைகளில் பணிபுரிகின்றனர்.
- PL4 நிலை: மூத்த இன்ஜினியர்கள், சிஸ்டம் இன்ஜினியர்கள், டெக்னாலஜி அனலிஸ்ட்கள் மற்றும் கன்சல்டன்ட்கள் ஆகியோருக்கு 80% முதல் 89% வரை போனஸ் கிடைக்கும்.
- PL5 நிலை: டிராக் லீட்களுக்கு 78% முதல் 87% வரை போனஸ் வழங்கப்படும்.
- PL6 நிலை: மேனேஜர்கள், டெலிவரி மேனேஜர்கள் மற்றும் அவர்களுக்கு மேலுள்ளவர்களுக்கு 75% முதல் 85% வரை போனஸ் கிடைக்கும்.
இந்த போனஸ், ஊழியர்களின் மதிப்பீடான “outstanding” முதல் “need attention” வரை மாறுபடும். இந்த போனஸ் ஆகஸ்ட் மாத ஊதியத்துடன் சேர்த்து வழங்கப்படும்.
More Read
வருங்காலத்திற்கான நம்பிக்கை
இன்போசிஸின் இந்த முடிவு அதன் “உயர்தர செயல்திறனுடன் கூடிய பணியிடப் பண்பாட்டை உருவாக்கும்” நோக்கத்தை உறுதிப்படுத்துகிறது. கடந்த நிதியாண்டில் தகுதியுடைய ஊழியர்களுக்கு இரண்டு கட்டங்களாக 5% முதல் 8% வரை சம்பள உயர்வுகள் வழங்கப்பட்டன. இந்த நிலையில், தற்போது அறிவிக்கப்பட்ட போனஸ், நிறுவனம் தனது ஊழியர்களை எவ்வளவு மதிப்பிடுகிறது என்பதை காட்டுகிறது. இது, ஊழியர்களின் மன உறுதியை உயர்த்துவதுடன், கடினமான சூழலிலும் நிறுவனத்தின் வளர்ச்சிக்கு முக்கிய பங்களிப்பை அளிக்க ஊக்கமளிக்கும் என்று எதிர்பார்க்கப்படுகிறது.
