நீலகிரி மாவட்ட சுற்றுலாத்துறை சார்பில், நீலகிரியின் பூர்வீகக் குடிமக்களான பழங்குடியினரின் கலை, கலாச்சாரம் மற்றும் பாரம்பரியத்தை வெளிப்படுத்தும் விதமாக “ரூட் ஃபெஸ்டிவல்” (Root Festival) என்ற பிரம்மாண்ட நிகழ்ச்சிக்கு ஏற்பாடு செய்யப்பட்டுள்ளது. முதன்முறையாக நடத்தப்படும் இந்த விழாவில், பழங்குடியின மக்கள் பல்வேறு பகுதிகளில் இருந்து ஒன்றிணைக்கப்பட்டுள்ளனர். பழங்குடியின மக்களின் கைவினைப் பொருட்கள், அலங்காரப் பொருட்கள், பாரம்பரிய ஓவியங்கள், புகைப்படங்கள் மற்றும் அவர்களின் வாழ்க்கை முறையை விளக்கும் காட்சிப் பொருட்கள் போன்றவை இந்தத் திருவிழாவில் இடம் பெற்றுள்ளன.
பழங்குடியினப் பண்பாட்டு மையத்தின் சார்பில் அமைக்கப்பட்ட அரங்குகள், சுற்றுலாப் பயணிகளைக் கவரும் விதமாக காலை முதல் மாலை வரை திறந்திருக்கும். பார்வையாளர்கள் இந்த அரங்குகளைச் சுற்றிப் பார்த்து, பழங்குடியினரின் தனித்துவமான கலைப் பொருட்களை வாங்கி ஆதரவு தரலாம். நீலகிரி மாவட்ட ஆட்சியர் லக்ஷ்மி பவ்யா இந்த விழாவை ரிப்பன் வெட்டி தொடங்கி வைத்தார். அவர் கண்காட்சியில் அமைக்கப்பட்டிருந்த அரங்குகளைப் பார்வையிட்டதுடன், குரும்பர் பழங்குடியினரின் பாரம்பரிய ஓவியம் ஒன்றையும் வரைந்து ரசித்தார். இந்த விழாவைக் காண பல்வேறு பகுதிகளிலிருந்து வந்திருந்த பள்ளி, கல்லூரி மாணவர்களும் கண்காட்சிப் பொருட்களை ஆர்வத்துடன் கண்டு களித்தனர்.
பழங்குடியினரின் பாரம்பரியங்களை வெளிப்படுத்தும் கலைப்பொருட்கள்
இந்த விழாவின் நோக்கம் குறித்து நீலகிரி மாவட்ட ஆட்சியர் லக்ஷ்மி பவ்யா பேசுகையில், “நீலகிரி மாவட்ட சுற்றுலாத் துறையின் முன்னெடுப்பாக இந்த நிகழ்ச்சி நடத்தப்படுகிறது. நீலகிரியின் பூர்வகுடி மக்களான பழங்குடியினர் மற்றும் உள்ளூர் மக்களின் கலாச்சாரத்தையும் பாரம்பரியத்தையும் வெளிப்படுத்த இது ஒரு சிறந்த வாய்ப்பு. தோடர் இன மக்களின் தனித்துவமான எம்பிராய்டரி வேலைப்பாடுகள், கோத்தர்களின் பாரம்பரிய கலைப்பொருட்கள், குரும்பர்களின் தனித்துவமான ஓவியங்கள் ஆகியவற்றை விளக்கும் வகையில் இங்கே அரங்குகள் அமைக்கப்பட்டுள்ளன. மேலும், பழங்குடியினர் ஆராய்ச்சி நிலையத்தின் உதவியுடன், அவர்களின் பாரம்பரிய இசைக்கருவிகளும் இங்கே காட்சிப்படுத்தப்பட்டுள்ளன. இந்த அரிய படைப்புகளை அனைவரும் கண்டு ரசித்து, நமது பூர்வீகக் கலைகளுக்கு ஆதரவு தர வேண்டும்” என்று தெரிவித்தார்.
நீலகிரியின் தனித்துவமான அடையாளங்கள்
இந்த ‘ரூட் ஃபெஸ்டிவல்’ நீலகிரியின் உண்மையான கலாச்சார அடையாளத்தை சுற்றுலாப் பயணிகளுக்கு அறிமுகப்படுத்துகிறது. இது வெறும் கண்காட்சி மட்டுமல்ல, பழங்குடியின மக்களின் வாழ்வியல் முறைகளையும், அவர்களின் பாரம்பரிய கலைகளையும் உலகறியச் செய்யும் ஒரு முக்கிய முயற்சி. அவர்களின் ஓவியங்கள், கைவினைப் பொருட்கள், இசைக்கருவிகள் ஆகியவை நீலகிரியின் இயற்கை அழகையும், பழங்குடியினரின் ஆத்மார்த்தமான வாழ்க்கையையும் பிரதிபலிக்கின்றன. இந்த நிகழ்வு உள்ளூர் பொருளாதாரத்திற்கும், பழங்குடியின கலைஞர்களுக்கும் ஒரு புதிய உத்வேகத்தை அளிக்கும் என எதிர்பார்க்கப்படுகிறது. மேலும் இதுபோன்று பல கலை விழாக்கள் நீலகிரி போன்ற இயற்கை எழில் சூழ்ந்த இடங்களில் நடத்தப்பட வேண்டும் என்று பல தரப்பினரும் கோரிக்கை விடுத்துள்ளனர்.
