தமிழகத்தில் நீடித்து வரும் வணிகப் பயன்பாட்டிற்கான LPG சிலிண்டர் தட்டுப்பாடு, தற்போது தலைநகர் சென்னையின் உணவுத் துறையை நிலைகுலையச் செய்துள்ளது. போதிய எரிவாயு விநியோகம் இல்லாத காரணத்தால், சென்னையில் மட்டும் சுமார் 215 சிறிய மற்றும் நடுத்தர உணவகங்கள் தற்காலிகமாக மூடப்பட்டுள்ளதாகத் தமிழ்நாடு ஹோட்டல் உரிமையாளர்கள் சங்கம் அதிகாரப்பூர்வமாகத் தெரிவித்துள்ளது.
வழக்கமான சிலிண்டர் விநியோகம் அடியோடு முடங்கியுள்ளதால், அன்றாடத் தேவைகளைச் சமாளிக்க முடியாமல் சிறு உணவக உரிமையாளர்கள் இந்தத் தீவிர முடிவை எடுத்துள்ளனர். கியாஸ் ஏஜென்சிகளிடம் இருந்து சிலிண்டர்கள் வரும் நேரத்தைப் பொறுத்து, அவ்வப்போது மட்டும் ஹோட்டல்களைத் திறந்து இயக்கும் நிலைக்குத் தள்ளப்பட்டுள்ளனர். மேலும், வாடிக்கையாளர்களுக்கு வழங்கப்படும் உணவுப் பட்டியலிலும் (Menu) கணிசமான மாற்றங்கள் செய்யப்பட்டுள்ளன. குறிப்பாக, அதிக நேரம் அடுப்பில் வேகவைக்க வேண்டிய உணவு வகைகளைத் தயாரிப்பதை ஹோட்டல் நிர்வாகங்கள் தவிர்த்து வருகின்றன.
பெரிய அளவிலான உணவகங்கள் இந்த நெருக்கடியைச் சமாளிக்க மாற்று வழிகளைக் கையாளத் தொடங்கியுள்ளன. பல முன்னணி ஹோட்டல்கள் தற்காலிகமாக விறகு அடுப்புகள் மற்றும் மின்சார அடுப்புகளுக்கு (Electric Stoves) மாறியுள்ளன. எனினும், இது கூடுதல் செலவு மற்றும் கால விரயத்தை ஏற்படுத்துவதாக உரிமையாளர்கள் வேதனை தெரிவிக்கின்றனர்.
மேற்காசியப் போர்ச் சூழலால் ஏற்பட்டுள்ள இந்தத் தட்டுப்பாடு இன்னும் சில நாட்கள் நீடித்தால், சென்னையில் உள்ள மேலும் பல உணவகங்கள் மூடப்படும் அபாயம் ஏற்பட்டுள்ளது. “எங்களிடம் இருக்கும் இருப்பை வைத்து ஓரிரு நாட்கள் மட்டுமே கடையை நடத்த முடியும். தட்டுப்பாடு சீராகவில்லை என்றால் பொதுமக்களுக்கான உணவு விநியோகம் முற்றிலும் பாதிக்கப்படும்” என்று சங்கத்தினர் எச்சரித்துள்ளனர். தமிழக அரசு தலையிட்டுத் தடையற்ற LPG விநியோகத்தை உறுதி செய்ய வேண்டும் என்பதே இவர்களின் பிரதான கோரிக்கையாக உள்ளது.
