தமிழ்நாடு விளையாட்டுத் துறையின் வரலாற்றில் ஒரு பொற்காலத்தை உருவாக்கும் விதமாக, 14வது FIH ஹாக்கி ஆடவர் ஜூனியர் உலகக் கோப்பை 2025 (FIH Hockey Men’s Junior World Cup 2025) இன்று நவம்பர் 28ஆம் தேதி பிரம்மாண்டமாகத் தொடங்குகிறது. சர்வதேச Hockey அரங்கில் தனக்கென ஒரு இடத்தைப் பதித்துள்ள தமிழ்நாட்டிற்கு, இந்த உலகக் கோப்பையை நடத்துவது கூடுதல் பெருமை. தலைநகர் சென்னை மற்றும் தென் மாவட்டத்தின் முத்தாய்ப்பான மதுரை ஆகிய இரண்டு நகரங்களில், டிசம்பர் 10ஆம் தேதி வரை இந்தப் போட்டிகள் நடைபெறவுள்ளன. ஒட்டுமொத்தமாக, 24 நாடுகளின் இளையோர் அணிகள் பங்கேற்கும் இந்த உலகக்கோப்பை, Hockey விளையாட்டின் உச்சபட்ச எதிர்பார்ப்பை எட்டியுள்ளது.
சர்வதேச தரத்திற்கு இணையாக மைதானங்கள் புதுப்பிக்கப்பட்டு, வீரர்கள் மற்றும் பார்வையாளர்களுக்கான அனைத்து வசதிகளும் உறுதி செய்யப்பட்டுள்ளன. தமிழ்நாடு அரசு, இந்த உலகக் கோப்பைக்காக சுமார் 44.36 கோடி ரூபாயை ஒதுக்கி, ஏற்பாடுகளில் எந்த குறையும் வைக்கவில்லை. சென்னையில் அமைந்துள்ள மேயர் ராதாகிருஷ்ணன் ஹாக்கி விளையாட்டரங்கம் மற்றும் மதுரையில் புதிதாகக் கட்டப்பட்ட தமிழ்நாடு விளையாட்டு மேம்பாட்டு ஆணையத்தின் ஹாக்கி விளையாட்டரங்கம் என இரண்டு இடங்களிலும் போட்டிகள் நடைபெற உள்ளன. தென் தமிழகத்தில் Hockey விளையாட்டுக்கு மறுமலர்ச்சி ஏற்படுத்தும் நோக்கில், மதுரையில் பிரத்யேகமாக ஒலிம்பிக் தரத்தில் ஊதா நிற டர்ஃப் கொண்ட மைதானம் உருவாக்கப்பட்டுள்ளது, இது ஒரு முக்கிய அம்சமாகும்.
வீரர்கள் மற்றும் மைதான ஏற்பாடுகள்
போட்டியில் பங்கேற்கும் உலகின் முன்னணி அணிகளான ஜெர்மனி, அர்ஜெண்டினா, ஸ்பெயின், நெதர்லாந்து மற்றும் போட்டியை நடத்தும் இந்திய அணி உட்பட அனைத்து நாடுகளின் வீரர்களும், பயிற்சியாளர்களும் சென்னை மற்றும் மதுரைக்கு வந்து சேர்ந்துள்ளனர். அவர்கள் தற்போது தீவிரப் பயிற்சியில் ஈடுபட்டு வருகின்றனர். இந்த Hockey திருவிழாவுக்கான ஏற்பாடுகளைத் துணை முதலமைச்சர் உதயநிதி ஸ்டாலின், நேரில் ஆய்வு செய்து, அனைத்து வசதிகளும் திருப்திகரமாக உள்ளதை உறுதி செய்தார். பாதுகாப்பு, உணவு, போக்குவரத்து, தங்குமிடம் போன்ற அத்தியாவசிய ஏற்பாடுகள் மட்டுமின்றி, மின்விளக்கு வசதிகளும் சர்வதேசப் போட்டிகளுக்குத் தேவையான தரத்தில் மேம்படுத்தப்பட்டுள்ளன.
சென்னை மற்றும் மதுரையில் உள்ள மைதானங்களில் பார்வையாளர்கள் அமரும் வசதிகள், வீரர்களுக்கான ஓய்வறைகள், மருத்துவ மையங்கள் மற்றும் கண்காணிப்பு கேமராக்கள் போன்ற கட்டமைப்புகள் அதிநவீன முறையில் நிறுவப்பட்டுள்ளன. குறிப்பாக, மதுரை மைதானத்தில் ஒட்டுமொத்த உள்கட்டமைப்பு மேம்பாட்டிற்காகக் கூடுதல் கவனம் செலுத்தப்பட்டுள்ளது. இந்த உலகக் கோப்பை, தமிழ்நாட்டை சர்வதேச விளையாட்டு மையமாக நிலைநிறுத்துவதில் ஒரு மைல்கல்லாக இருக்கும் என விளையாட்டு ஆர்வலர்கள் நம்புகின்றனர்.
குழுக்கள் மற்றும் முக்கிய போட்டிகள்
இந்த உலகக் கோப்பையில் பங்கேற்கும் 24 அணிகள் 6 பிரிவுகளாகப் பிரிக்கப்பட்டுள்ளன. புரவலர் நாடான இந்தியா, சிலி, சுவிட்சர்லாந்து மற்றும் ஓமன் ஆகிய நாடுகளுடன் ‘பி’ பிரிவில் இடம்பிடித்துள்ளது.
More Read
- குரூப் ஏ: ஜெர்மனி, தென்னாப்பிரிக்கா, கனடா, அயர்லாந்து
- குரூப் பி: இந்தியா, சிலி, சுவிட்சர்லாந்து, ஓமன்
- குரூப் சி: அர்ஜெண்டினா, நியூசிலாந்து, ஜப்பான், சீனா
- குரூப் டி: ஸ்பெயின், பெல்ஜியம், எகிப்து, நமீபியா
- குரூப் இ: நெதர்லாந்து, மலேசியா, இங்கிலாந்து, ஆஸ்திரியா
- குரூப் எஃப்: பிரான்ஸ், ஆஸ்திரேலியா, கொரியா, பங்களாதேஷ்
போட்டியின் தொடக்க நாளான இன்று (நவம்பர் 28) சென்னையில் அர்ஜெண்டினா-ஜப்பான் அணிகள் மோதும் ஆட்டமும், மதுரையில் ஸ்பெயின்-எகிப்து அணிகள் மோதும் ஆட்டமும் நடைபெறவுள்ளன. இந்திய அணி தனது முதல் ஆட்டத்தில் இன்று சிலியை எதிர்கொள்கிறது. லீக் சுற்றுகள் முடிந்ததும், டிசம்பர் 5ஆம் தேதி முதல் காலிறுதி ஆட்டங்கள் சென்னையில் தொடங்கும். அரையிறுதி ஆட்டங்கள் டிசம்பர் 7ஆம் தேதியும், இறுதி ஆட்டம் மற்றும் மூன்றாம் இடத்துக்கான ஆட்டம் டிசம்பர் 10ஆம் தேதியும் நடைபெறவுள்ளது.
ரசிகர்கள் மற்றும் இலவச அனுமதி
ஹாக்கி விளையாட்டை மக்கள் மத்தியில் கொண்டு செல்லவும், விளையாட்டு வீரர்களை உற்சாகப்படுத்தவும் தமிழ்நாடு அரசு ஒரு சிறப்பான முடிவை எடுத்துள்ளது. சென்னை மற்றும் மதுரையில் நடைபெறும் அனைத்துப் போட்டிகளுக்கும் பொதுமக்களுக்கு கட்டணமின்றி அனுமதி வழங்கப்பட்டுள்ளது. ரசிகர்கள் http://ticketgenie.in என்ற இணையதளம் மூலமாகவும், ஹாக்கி இந்தியா மொபைல் செயலி மூலமாகவும் இலவச டிக்கெட்டுகளை முன்பதிவு செய்துகொள்ளலாம். இருப்பினும், ஒரு நபர் அதிகபட்சம் நான்கு டிக்கெட்டுகள் மட்டுமே பெற முடியும். பள்ளி, கல்லூரி மாணவர்கள் நேரில் வந்து போட்டிகளைக் காணும் வகையில், தமிழ்நாடு விளையாட்டு மேம்பாட்டு ஆணையத்தின் மூலம் சிறப்புப் போக்குவரத்து வசதிகளும் செய்யப்பட்டுள்ளன. இந்த உலகக் கோப்பை, தமிழ்நாட்டின் அடுத்த தலைமுறை Hockey வீரர்களுக்கு ஒரு பெரும் உத்வேகத்தை அளிக்கும் என்பதில் சந்தேகமில்லை.
