வீட்டின் அமைப்பும், அங்கு வைக்கப்படும் பொருட்களும் ஒரு குடும்பத்தின் அதிர்ஷ்டத்தையும், செல்வத்தையும் தீர்மானிக்கின்றன என்பது வாஸ்து சாஸ்திரத்தின் அடிப்படை நம்பிக்கை. குறிப்பாக, ஒரு வீட்டின் வரவேற்பறை என்பது அந்த வீட்டின் முகமாக கருதப்படுகிறது. வீட்டிற்குள் நுழையும் நேர்மறை ஆற்றலை ஈர்த்து, எதிர்மறை ஆற்றலை வெளியேற்றும் முக்கியப் பங்கு வரவேற்பறைக்கு உண்டு. எனவே, வரவேற்பறையில் என்னென்ன பொருட்களை வைக்கலாம், எவற்றைத் தவிர்க்க வேண்டும் என்பது குறித்த வாஸ்து நிபுணர்களின் வழிகாட்டுதல்கள் இங்கே விரிவாகப் பகிரப்பட்டுள்ளன.
வரவேற்பறையின் சரியான திசையும் அமைப்பும்
வாஸ்து படி, ஒரு வீட்டின் வரவேற்பறை எப்போதும் விசாலமாகவும், காற்றோட்டமாகவும் இருக்க வேண்டும். சூரிய ஒளி நேரடியாக வீட்டிற்குள் நுழையும் வகையில் ஜன்னல்களை அமைப்பது மிக அவசியம். காலை முதல் மாலை வரை ஜன்னல்கள் திறந்திருந்தால், நேர்மறை ஆற்றல் தங்குதடையின்றி வீட்டிற்குள் பரவும். வரவேற்பறையின் சுவர்கள் லேசான நிறங்களில் (வெள்ளை, கிரீம்) இருப்பது சிறந்தது. இது அமைதியையும், நேர்மறை அதிர்வுகளையும் உருவாக்கும். ஹாலில் உள்ள சீலிங் வெள்ளை நிறத்தில் இருப்பது மிகவும் நன்மை தரும்.
சோபா, நாற்காலிகள் மற்றும் தளவாடங்கள்
வரவேற்பறையில் சோபா மற்றும் நாற்காலிகளை கிழக்கு அல்லது வடக்கு திசையில் அமைப்பது உகந்தது. தெற்கு அல்லது மேற்கு சுவரை ஒட்டி சோபாக்களைப் போடலாம். ஆனால், வடகிழக்கு மூலையில் அல்லது வீட்டின் மையப் பகுதியான பிரம்மஸ்தானத்தில் கனமான தளவாடங்களை வைப்பதைத் தவிர்க்க வேண்டும். இது ஆற்றல் ஓட்டத்திற்குத் தடையாக இருக்கும். மேலும், வரவேற்பறையில் அதிகப்படியான சோபா மற்றும் நாற்காலிகளை வைப்பதைத் தவிர்க்க வேண்டும். இது அடைக்கப்பட்ட உணர்வை ஏற்படுத்தி, நேர்மறை ஆற்றலைத் தடுக்கும்.
More Read
எலக்ட்ரானிக் பொருட்களுக்கான வாஸ்து
தொலைக்காட்சி, இசைக்கருவிகள் போன்ற எலக்ட்ரானிக் பொருட்களை வரவேற்பறையின் தென்கிழக்கு மூலையில் வைப்பது வாஸ்து ரீதியாக மிகவும் நல்லது. எக்காரணம் கொண்டும் தென்மேற்குப் பகுதியில் இவற்றை வைக்கக்கூடாது. அவ்வாறு வைத்தால் இயந்திரங்கள் அடிக்கடி பழுதாகும் வாய்ப்புகள் அதிகம் என வாஸ்து நிபுணர்கள் எச்சரிக்கின்றனர்.
அழகு மற்றும் அலங்காரப் பொருட்கள்
வரவேற்பறையின் அழகை மேம்படுத்த இயற்கை காட்சிகள், பசுமையான வனங்கள், நீர்வீழ்ச்சிகள், ஓடும் நதி போன்ற படங்கள் அடங்கிய வால் பேப்பர்களைப் பயன்படுத்தலாம். பிரம்மாண்டமான கடவுள் படங்கள், குறிப்பாக மதுரை மீனாட்சி அம்மன், பிள்ளையார்பட்டி கற்பக விநாயகர் போன்ற படங்களை வைப்பது செல்வ வளத்தை ஈர்க்கும். நுழைவு வாயிலுக்கு எதிரே கற்பக விநாயகரின் படத்தை மாட்டி வைப்பது மிகச்சிறந்த பலன்களைத் தரும்.
மேலும், மகாலட்சுமியின் அம்சமாக கருதப்படும் வலம்புரி சங்கை வரவேற்பறையில் வைப்பது வீட்டில் செல்வ வளத்தை பெருக செய்யும். மீன் தொட்டியை கிழக்கு அல்லது வடகிழக்கு திசையில் வைக்கலாம். வாசனையான மலர்கள் கொண்ட பூந்தொட்டிகள், கற்றாழை செடிகள் போன்றவற்றை வைப்பது நேர்மறை ஆற்றலை அதிகரிக்கும். சங்கு மற்றும் மணிகளை வரவேற்பறையில் வைப்பதன் மூலம் எதிர்மறை ஆற்றல்கள் வீட்டிலிருந்து வெளியேறும்.
வரவேற்பறையில் தவிர்க்க வேண்டியவை
வீட்டின் வரவேற்பறையில் ஒருபோதும் உக்கிரமான படங்கள், போர்கள், ரத்தம் சிந்துதல், கொடிய விலங்குகளின் புகைப்படங்கள் ஆகியவற்றை வைக்கக்கூடாது. இது வீட்டில் எதிர்மறை அதிர்வுகளை உருவாக்கும். அதேபோல, காகித மலர்கள், போன்சாய் மரங்கள் மற்றும் கள்ளிச் செடிகள் போன்றவற்றை வரவேற்பறையில் வைப்பதைத் தவிர்க்க வேண்டும். இவை குடும்ப உறவுகளில் பிளவுகளையும், மனக்கசப்புகளையும் ஏற்படுத்தும் என வாஸ்து சாஸ்திரம் கூறுகிறது. உடைந்த நாற்காலிகள், விரிசலடைந்த பொருட்கள், பழுதடைந்த அலங்காரப் பொருட்களை உடனடியாக அப்புறப்படுத்துவது அவசியம். இறந்தவர்களின் புகைப்படங்களை வரவேற்பறையில் வைப்பதை தவிர்ப்பதே சிறந்தது. இந்த வாஸ்து குறிப்புகளைப் பின்பற்றுவதன் மூலம், உங்கள் வீட்டின் வரவேற்பறையை நேர்மறை ஆற்றல் நிறைந்த இடமாக மாற்றி, செல்வ வளத்தையும், மகிழ்ச்சியையும் ஈர்க்கலாம்.
