மக்களவையில் இன்று நடைபெற்ற 2026-27 நிதியாண்டுக்கான மத்திய பட்ஜெட் மீதான விவாதத்தில், எதிர்க்கட்சித் தலைவர் Rahul Gandhi பங்கேற்று சுமார் 45 நிமிடங்களுக்கும் மேலாக அனல் பறக்கும் உரையை நிகழ்த்தினார். அப்போது, மத்திய அரசு சமீபத்தில் அமெரிக்காவுடன் மேற்கொண்டுள்ள இடைக்கால வர்த்தக ஒப்பந்தம் மற்றும் இந்தியாவின் ஜவுளித்துறை எதிர்கொண்டுள்ள சவால்கள் குறித்து அவர் சரமாரியான குற்றச்சாட்டுகளை முன்வைத்தார். குறிப்பாக, “இந்தியாவின் ஜவுளித்துறையை வங்கதேசம் அழிக்கப் போகிறது” என்று அவர் எச்சரித்தது அவையில் பெரும் பரபரப்பை ஏற்படுத்தியது.
தனது உரையில் பொருளாதார ஆய்வறிக்கை மற்றும் புவிசார் அரசியல் சூழல்கள் குறித்துப் பேசிய ராகுல் காந்தி, “போர் சகாப்தம் முடிந்துவிட்டது என்று பிரதமர் மோடி கூறுவது முற்றிலும் தவறானது. நாம் உக்ரைன், காசா மற்றும் மத்திய கிழக்கு நாடுகளின் போர் சூழலுக்கு மத்தியில்தான் வாழ்ந்து கொண்டிருக்கிறோம்” என்று குறிப்பிட்டார். மேலும், அமெரிக்காவுடனான வர்த்தக ஒப்பந்தம் ஒருதலைப்பட்சமானது என்றும், இதன் மூலம் இந்தியாவின் எரிசக்தி பாதுகாப்பு மற்றும் விவசாயிகளின் நலன்கள் அடகு வைக்கப்பட்டுள்ளதாகவும் அவர் குற்றம் சாட்டினார்.
ஜவுளித்துறை குறித்துப் பேசுகையில், “இந்தியாவின் ஜவுளித்துறை ஏற்கனவே மிகப்பெரிய சரிவைச் சந்தித்துள்ளது. தற்போதுள்ள 18 சதவீத வரி விதிப்பு மற்றும் இறக்குமதி கட்டுப்பாடுகளால் இந்தியாவின் ஜவுளித்துறையை வங்கதேசம் முழுமையாக முந்திக்கொண்டு அதனை அழித்துவிடும் சூழல் உருவாகியுள்ளது” என்றார். மேலும், அமெரிக்காவின் இயந்திரமயமாக்கப்பட்ட பிரம்மாண்ட விவசாயத்துறை இந்திய விவசாயிகளை நசுக்கப்போகிறது என்றும், அமெரிக்கத் தரப்பில் இந்தியப் பொருட்களுக்கு 18 சதவீத வரி விதிக்கப்பட்டுள்ள நிலையில், இந்தியாவிற்குள் அமெரிக்கப் பொருட்கள் நுழைய கதவுகள் திறந்துவிடப்பட்டுள்ளதாகவும் Rahul Gandhi சாடினார்.
மிக முக்கியமாக, அதானியின் வழக்கைக் காட்டி அமெரிக்கா பிரதமர் மோடியின் கழுத்தை நெரித்து (Choke) அழுத்தம் கொடுப்பதாக ராகுல் காந்தி மிகக் கடுமையான வார்த்தைகளால் விமர்சித்தார். “பாரத மாதாவை விற்றுவிட்டீர்கள்” என்று அவர் கூறியதற்கு ஆளும் தரப்பு எம்பிக்கள் கடும் எதிர்ப்பு தெரிவித்தனர். 140 கோடி இந்தியர்களின் தரவுகள் (Data) மற்றும் எதிர்காலத்தை பாஜக அரசு அமெரிக்காவிடம் அடகு வைத்துள்ளதாக அவர் கூறினார். மேலும், ஜெஃப்ரி எப்ஸ்டீன் கோப்புகள் மற்றும் அனில் அம்பானி விவகாரங்களைக் குறிப்பிட்ட அவர், இந்த வர்த்தக ஒப்பந்தம் ஒரு நெருக்கடியின் விளைவாகவே கையெழுத்திடப்பட்டுள்ளது என்று வாதிட்டார்.
மக்கள்தொகை அதிகரிப்பை ஒரு சுமையாகக் கருதாமல், அதை ஒரு சொத்தாகக் கருதி அமெரிக்காவுடன் சமமான நிலையில் நின்று பேச்சுவார்த்தை நடத்தியிருக்க வேண்டும் என்று ராகுல் காந்தி வலியுறுத்தினார். “டாலரைப் பாதுகாக்க அமெரிக்காவிற்கு இந்தியர்களின் தரவுகள் தேவைப்படுகிறது. அப்படி இருக்கும்போது நாம் ஏன் அடிபணிந்து ஒப்பந்தம் செய்ய வேண்டும்?” என்று அவர் கேள்வி எழுப்பினார். ராகுல் காந்தியின் இந்தப் பேச்சுக்கு மத்திய அமைச்சர்கள் கிரண் ரிஜிஜு மற்றும் ஹர்தீப் சிங் பூரி ஆகியோர் அவ்வப்போது குறுக்கிட்டு கடும் எதிர்ப்பு தெரிவித்தனர்.
