தமிழக முதலமைச்சர் மு.க.ஸ்டாலின் அவர்கள், மாநிலத்தின் இளம் தலைமுறையினருடன் நேரடியாகக் கலந்துரையாடும் வகையில் VibeWithMKS என்ற புதிய முன்னெடுப்பைத் தொடங்கியுள்ளார். இது தொடர்பான அதிரடியான ‘டிரெய்லர்’ (Trailer) வீடியோ அவரது அதிகாரப்பூர்வ சமூக வலைதளப் பக்கங்களில் இன்று வெளியிடப்பட்டது.
இளைஞர்களின் கனவுகள், சவால்கள் மற்றும் அவர்களின் எதிர்பார்ப்புகளைப் புரிந்துகொள்ளும் விதமாக இந்தத் தொடர் உருவாக்கப்பட்டுள்ளது. இதன் முதல் வீடியோ நாளை (டிசம்பர் 24, 2025) மாலை 4 மணிக்கு வெளியாக உள்ளது.
விளையாட்டும் நம்பிக்கையும்: முதல் எபிசோட்
தற்போது வெளியாகியுள்ள ‘ப்ரோமோ’ வீடியோவில், முதல்வர் மு.க.ஸ்டாலின் அவர்கள் இளம் விளையாட்டு வீரர் மற்றும் வீராங்கனைகளுடன் கலந்துரையாடுவதைக் காண முடிகிறது. இது குறித்துத் தனது எக்ஸ் (X) தளத்தில் பதிவிட்டுள்ள அவர்:
“ஒழுக்கம் (Discipline), தன்னம்பிக்கை (Confidence) மற்றும் நற்பண்புகளை (Character) உருவாக்குவது விளையாட்டு! அப்படிப்பட்ட இளம் சாம்பியன்களுடன் ஆர்வம் (Passion), அழுத்தம் (Pressure) மற்றும் விடாமுயற்சி (Perseverance) பற்றி எனது உரையாடல்… நான் ரெடி! நீங்க ரெடியா?” எனக் குறிப்பிட்டுள்ளார்.
இந்தக் கலந்துரையாடலில் விளையாட்டுத் துறையில் உள்ள சவால்கள், வெற்றிக்கான பாதையில் எதிர்கொள்ளும் மன அழுத்தம் மற்றும் அதனை முறியடிக்கும் விதம் குறித்து முதல்வர் விரிவாகப் பேசியுள்ளதாகத் தெரிகிறது.
VibeWithMKS – நோக்கமும் எதிர்பார்ப்பும்
அரசியல் மற்றும் நிர்வாகப் பணிகளுக்கு அப்பாற்பட்டு, இளைஞர்களுடன் ஒரு நண்பராகவும், வழிகாட்டியாகவும் முதல்வர் உரையாடுவதே VibeWithMKS-ன் முக்கிய நோக்கமாகும். ஏற்கனவே ‘நாடாளுமன்றத்தில் ஸ்டாலின்’, ‘உங்களில் ஒருவன்’ போன்ற வீடியோ தொடர்கள் மூலம் மக்களைச் சென்றடைந்த முதல்வர், தற்போது டிஜிட்டல் யுக இளைஞர்களைக் கவரும் வகையில் இந்த ‘Vibe’ மோடில் களம் இறங்கியுள்ளார்.
More Read
மாணவர்கள், இளம் தொழில்முனைவோர் மற்றும் சாதனையாளர்கள் எனப் பல்வேறு தரப்பினருடன் இந்தத் தொடர் நீடிக்கும் என எதிர்பார்க்கப்படுகிறது. முதல்வரின் இந்தப் புதிய முயற்சி, இளைஞர்கள் மத்தியில் பெரும் வரவேற்பைப் பெற்றுள்ளது. சமூக வலைதளங்களில் #VibeWithMKS என்ற ஹேஷ்டேக் தற்போது டிரெண்டிங்கில் உள்ளது.
