தமிழகச் சட்டமன்றத்தின் 2026-ம் ஆண்டிற்கான முதல் கூட்டத்தொடர் இன்று (ஜனவரி 20, 2026) தொடங்கிய நிலையில், ஆளுநர் ஆர்.என். ரவி தனது உரையை முழுமையாக வாசிக்காமல் அவையிலிருந்து பாதியில் வெளிநடப்பு செய்தது பெரும் பரபரப்பை ஏற்படுத்தியுள்ளது. ஆளுநர் உரையைத் தொடங்குவதற்கு முன்பாக, தேசிய கீதம் இசைக்கப்படவில்லை என்றும், தனது மைக் அணைக்கப்பட்டதாகவும் குற்றம் சாட்டி அவர் வெளியேறினார். இது ஆளுநர் ஆர்.என். ரவி தமிழகச் சட்டமன்றத்தில் இருந்து தொடர்ந்து நான்காவது ஆண்டாக (2023-2026) வெளிநடப்பு செய்யும் நிகழ்வாகும்.
ஆளுநரின் இந்தச் செயலைத் தொடர்ந்து, சபையில் சிறப்புத் தீர்மானத்தைக் கொண்டு வந்து பேசிய முதலமைச்சர் மு.க. Stalin, “ஆளுநரின் செயல் அவர் வகிக்கக்கூடிய உயரிய பதவிக்கு அழகல்ல. இது 100 ஆண்டுகாலப் பாரம்பரியம் கொண்ட சட்டமன்றத்தின் மாண்பைச் சிதைக்கும் செயல்” என்று மிகக் கடுமையாகச் சாடினார். மேலும், “ஆட்டுக்குத் தாடியும், நாட்டுக்கு ஆளுநர் பதவியும் தேவையில்லை” என்ற பேரறிஞர் அண்ணாவின் பொன்மொழியை நினைவு கூர்ந்த முதலமைச்சர் Stalin, ஆளுநர் உரை என்பது மாநில அரசால் தயாரிக்கப்பட்டு அரசமைப்புச் சட்டத்தின்படி ஆளுநரால் முழுமையாகப் படிக்கப்பட வேண்டிய ஒன்று; அதில் சொந்தக் கருத்துக்களைச் சேர்க்கவோ, நீக்கவோ ஆளுநருக்கு அதிகாரம் இல்லை என்றும் விளக்கமளித்தார்.
இந்த அசாதாரண சூழலில், ஆளுநர் உரை வாசிக்கப்பட்டதாகவே அவை ஏற்க வேண்டும் என்ற தீர்மானத்தை முதலமைச்சர் Stalin கொண்டு வந்தார். அதனைத் தொடர்ந்து சபாநாயகர் அப்பாவு ஆளுநர் உரையைத் தமிழில் முழுமையாக வாசித்தார். ஆளுநர் மாளிகை (லோக்பவன்) வெளியிட்டுள்ள அறிக்கையில், தமிழக அரசின் உரையில் “தவறான தகவல்கள்” இருந்ததாகவும், பல மக்கள் நலப் பிரச்சினைகள் புறக்கணிக்கப்பட்டதாலேயே ஆளுநர் வெளியேறினார் என்றும் தெரிவிக்கப்பட்டுள்ளது. இருப்பினும், ஆளுநரின் இந்தத் தொடர் வெளிநடப்பு தமிழக அரசியலில் பெரும் விவாதத்தை ஏற்படுத்தியுள்ளது.
