சர்வதேச விண்வெளி நிலையத்திற்குப் பயணம் மேற்கொண்ட முதல் இந்திய விண்வெளி வீரர் என்ற பெருமையைப் பெற்ற குரூப் கேப்டன் சுபன்ஷு சுக்லா, தனது 18 நாட்கள் வரலாற்றுச் சிறப்புமிக்க விண்வெளிப் பயணத்தை வெற்றிகரமாக முடித்துக்கொண்டு பூமிக்குத் திரும்பியுள்ளார். இந்த விண்வெளிப் பயணம் இந்தியாவின் விண்வெளி ஆய்வில் ஒரு புதிய மைல்கல்லாகப் பார்க்கப்படுகிறது. ஜூன் 25, 2025 அன்று ஸ்பேஸ்எக்ஸ் ஃபால்கன் 9 ராக்கெட் மற்றும் டிராகன் விண்கலம் மூலம் அமெரிக்காவின் கென்னடி விண்வெளி மையத்திலிருந்து புறப்பட்ட Shubhanshu Shukla மற்றும் அவரது குழுவினர், சர்வதேச விண்வெளி நிலையத்தை (ISS) சென்றடைந்தனர். அங்கு அவர்கள் 18 நாட்கள் தங்கியிருந்து பல்வேறு அறிவியல் ஆய்வுகளையும், சோதனைகளையும் மேற்கொண்டனர்.
இந்த விண்வெளிப் பயணம் இந்திய விண்வெளி ஆராய்ச்சி நிறுவனமான இஸ்ரோவுக்கு (ISRO) ஒரு முக்கியமான திருப்புமுனையாகும். சுபன்ஷு சுக்லா, விண்வெளியில் இந்தியாவின் பெருமையை நிலைநாட்டினார். இந்த பயணத்தின் போது, அவர் மனித ஆரோக்கியம், விண்வெளி விவசாயம் உள்ளிட்ட பல்வேறு துறைகளில் 60க்கும் மேற்பட்ட சோதனைகளை வெற்றிகரமாகச் செய்து முடித்துள்ளார். இந்த ஆய்வுகள் இந்தியாவின் எதிர்கால மனித விண்வெளிப் பயணமான ககன்யான் திட்டத்திற்கு மிகவும் பயனுள்ளதாக அமையும் என்று எதிர்பார்க்கப்படுகிறது.
பிரதமர் நரேந்திர மோடி, சுபன்ஷு சுக்லா சர்வதேச விண்வெளி நிலையத்தில் இருந்தபோது அவருடன் காணொலிக் காட்சி மூலம் உரையாடினார். அப்போது சுபன்ஷுவின் இந்த பயணம் 140 கோடி இந்தியர்களின் கனவுகளைப் பிரதிபலிப்பதாகக் குறிப்பிட்டார். தனது சிறுவயதில் விண்வெளி வீரராகும் கனவை தான் நினைத்துக்கூட பார்க்கவில்லை என்றும், ஆனால் பிரதமரின் தலைமையில் இன்றைய இந்தியா அத்தகைய கனவுகளை நனவாக்க உதவுகிறது என்றும் சுபன்ஷு சுக்லா தெரிவித்தார். மேலும், அவர் இந்தியாவிலிருந்து எடுத்துச் சென்ற பாரம்பரிய இந்திய உணவு வகைகளை சக விண்வெளி வீரர்களுடன் பகிர்ந்து கொண்டதாகவும் கூறினார்.
சுபன்ஷு சுக்லா மற்றும் அவரது குழுவினர் ஜூலை 15, 2025 அன்று சர்வதேச விண்வெளி நிலையத்தில் இருந்து புறப்பட்டு, சுமார் 22.5 மணிநேர பயணத்திற்குப் பிறகு, கலிபோர்னியாவின் சான் டியாகோ அருகே பசிபிக் பெருங்கடலில் ஸ்பேஸ்எக்ஸ் டிராகன் காப்ஸ்யூலில் வெற்றிகரமாகத் தரையிறங்கினர். விண்கலம் தரையிறங்கியவுடன், மீட்புப் படையினர் உடனடியாகச் சென்று விண்வெளி வீரர்களை பத்திரமாக மீட்டனர். சுக்லாவின் இந்த சாதனைக்காக அவரது குடும்பத்தினர் மற்றும் நண்பர்கள் கேக் வெட்டி கொண்டாடினர். சுக்லாவின் தந்தை, “சுபன்ஷுவின் பணி வெற்றிகரமாக இருந்ததும், அவர் பாதுகாப்பாக தரையிறங்கியதும் எங்களுக்கு மகிழ்ச்சியை அளிக்கிறது. நாங்கள் அவரைப் பற்றி மிகவும் பெருமைப்படுகிறோம்” என்று கூறினார். பிரதமர் மோடியும் தனது சமூக ஊடக எக்ஸ் பக்கத்தில், சுபன்ஷு சுக்லாவை வரவேற்று, அவரது அர்ப்பணிப்பு, துணிச்சல் மற்றும் முன்னோடி மனப்பான்மை கோடிக்கணக்கான கனவுகளுக்கு உயிரூட்டியுள்ளது என்று பாராட்டினார். இந்த விண்வெளிப் பயணம் இந்தியாவின் விண்வெளி ஆராய்ச்சி வரலாற்றில் பொன் எழுத்துக்களால் பொறிக்கப்படும் ஒரு நிகழ்வாகும்.
