இந்தியப் பணக்காரர்களில் ஒருவரான முகேஷ் அம்பானி தலைமையிலான ரிலையன்ஸ் இண்டஸ்ட்ரீஸ், டெலிகாம் மற்றும் ரீடெய்ல் துறைகளைத் தொடர்ந்து தற்போது மருத்துவ நோயறிதல் (Health Diagnostics) துறையில் மாபெரும் புரட்சியை ஏற்படுத்தத் தயாராகி வருகிறது. குறிப்பாக, மேம்பட்ட Genetic Testing (மரபணுப் பரிசோதனை) சேவைகளைச் சமானிய மக்களும் அணுகும் வகையில் மிக மலிவு விலையில் அறிமுகம் செய்ய ரிலையன்ஸ் திட்டமிட்டுள்ளது. 2016-ல் ஜியோ மூலம் இணையச் சேவையை மலிவாக்கி எப்படி ஒரு புரட்சியை ஏற்படுத்தியதோ, அதேபோல் தற்போது ஜீனோம் டெஸ்ட் சந்தையை மாற்றியமைக்க ரிலையன்ஸ் களம் இறங்கியுள்ளது.
தற்போது இந்தியச் சந்தையில் அடிப்படை Genetic Testing செய்வதற்குச் சுமார் ரூ.10,000 வரை செலவாகிறது. ஆனால், ரிலையன்ஸ் இந்த விலையைப் பத்து மடங்கு குறைத்து, வெறும் ரூ.1,000-க்குள் வழங்க முடிவு செய்துள்ளது. இந்த அதிரடி விலை குறைப்பு, நடுத்தர மற்றும் ஏழை எளிய மக்களும் தங்களின் மரபணு சார்ந்த நோய்களை முன்கூட்டியே கண்டறியப் பெரும் உதவியாக இருக்கும் என்று எதிர்பார்க்கப்படுகிறது.
ஸ்ட்ராண்ட் லைஃப் சயின்ஸஸ்: ரிலையன்ஸின் தொழில்நுட்ப பலம்
இந்த மாபெரும் திட்டத்தைச் செயல்படுத்த ரிலையன்ஸ் நிறுவனம், பெங்களூருவைத் தலைமையிடமாகக் கொண்டு இயங்கும் ‘ஸ்ட்ராண்ட் லைஃப் சயின்ஸஸ்’ (Strand Life Sciences) நிறுவனத்தைப் பயன்படுத்துகிறது. 2021 ஆம் ஆண்டில் சுமார் ரூ.393 கோடி முதலீட்டில் ரிலையன்ஸ் இந்த நிறுவனத்தைக் கைப்பற்றியது. ஜீனோம் சையின்ஸ் மற்றும் சிறப்பு ஹெல்த் டயாக்னாஸ்டிக்ஸ் துறையில் ஸ்ட்ராண்ட் நிறுவனம் உலகத்தரம் வாய்ந்த நிபுணத்துவம் பெற்றுள்ளது.
இந்த நிறுவனத்தின் அதிநவீன தொழில்நுட்பம் மற்றும் ஆராய்ச்சி முடிவுகளைப் பயன்படுத்தி, இந்தியச் சூழலுக்கு ஏற்ப மலிவு விலையில் Genetic Testing கருவிகள் மற்றும் சேவைகளை ரிலையன்ஸ் உருவாக்க உள்ளது. இதன் மூலம், இதுவரை வசதி படைத்தவர்களுக்கு மட்டுமே எட்டாக்கனியாக இருந்த மேம்பட்ட மருத்துவப் பரிசோதனைகள், இனி சாதாரண மக்களின் வீட்டு வாசலுக்கே வரவுள்ளது.
Genetic Testing ஏன் அவசியம்? அதன் பயன்கள் என்ன?
மரபணுப் பரிசோதனை என்பது வெறும் நோயைக் கண்டறிவது மட்டுமல்ல, ஒருவரின் எதிர்கால ஆரோக்கியத்தைத் தீர்மானிக்கும் காரணியாகவும் அமைகிறது.
More Read
- பரம்பரை நோய்கள்: இரத்த அழுத்தம், நீரிழிவு மற்றும் இதய நோய்கள் போன்றவை பரம்பரையாகத் தொடருமா என்பதை முன்கூட்டியே அறியலாம்.
- புற்றுநோய் கண்டறிதல்: ஒருவரின் உடலில் புற்றுநோய் செல்கள் வளர வாய்ப்புள்ளதா என்பதை Genetic Testing மூலம் கண்டறிந்து, ஆரம்பக் கட்டத்திலேயே சிகிச்சையைத் தொடங்கலாம்.
- தனிப்பட்ட சிகிச்சை (Personalised Medicine): ஒரு மருந்தானது குறிப்பிட்ட நபரின் உடலுக்கு எப்படி வேலை செய்யும் என்பதை மரபணு ரீதியாக ஆராய்ந்து, அவருக்கு ஏற்ற சரியான சிகிச்சையைத் தீர்மானிக்க இது உதவுகிறது.
- தடுப்பு முறைகள்: ஒருவரின் உடலில் எதிர்காலத்தில் நோய் வரும் அபாயத்தை மதிப்பீடு செய்து, அதற்கு ஏற்றவாறு வாழ்க்கை முறையை மாற்றியமைக்க இது வழிகாட்டுகிறது.
சுகாதாரத் துறையில் ஏற்படப்போகும் தாக்கம்
இரத்தம், உமிழ்நீர் அல்லது உடல் திசுக்களைப் பயன்படுத்திச் செய்யப்படும் இந்த Genetic Testing சோதனைகள், விலையின் காரணமாகவே இதுவரை பல கோடி மக்களால் பயன்படுத்தப்படாமல் இருந்தது. ரிலையன்ஸ் நிறுவனம் இந்த விலையை ரூ.1,000-ஆகக் குறைக்கும்போது, லட்சக்கணக்கான குடும்பங்கள் பயனடைவார்கள். இது இந்தியாவின் பொதுச் சுகாதாரத் தரத்தை (Public Health Standard) உலகத் தரத்திற்கு உயர்த்தும் ஒரு மைல்கல்லாகப் பார்க்கப்படுகிறது.
முகேஷ் அம்பானியின் இந்தத் தொலைநோக்குப் பார்வை, மருத்துவத் துறையில் உள்ள கார்ப்பரேட் நிறுவனங்களுக்கு ஒரு சவாலாக இருக்கும் அதே வேளையில், சாமானிய மக்களுக்கு ஒரு வரப்பிரசாதமாக அமையும் என்பதில் சந்தேகமில்லை.
