கேரளத்தின் பாரம்பரியம், கலாசாரம், மற்றும் அன்பைப் பறைசாற்றும் அறுவடைத் திருவிழாதான் ஓணம். மலையாள ஆண்டின் சிங்கம் மாதத்தில் (ஆவணி மாதம்) ஹஸ்தம் நட்சத்திரத்தில் தொடங்கி, திருவோணம் நட்சத்திரம் வரை 10 நாட்கள் இந்த கொண்டாட்டங்கள் கோலாகலமாக நடைபெறுகின்றன. மக்களின் நேசத்திற்குரிய மன்னன் மகாபலியின் வருகையை வரவேற்கும் விதமாக, இந்த பண்டிகை ஒட்டுமொத்த கேரள மக்களையும் ஒன்றிணைக்கிறது.
ஓணம் கொண்டாடப்படுவதன் பின்னணி என்ன?
அசுரர்களின் மன்னனான மகாபலி, நீதி வழுவாமல் ஆட்சி செய்து வந்தார். அவரது நல்லாட்சியில் மக்கள் வளமுடன் வாழ்ந்தனர். ஆனால், தேவர்கள் மீது பொறாமை கொண்ட மகாபலி, சொர்க்கலோகத்தையும் கைப்பற்ற நினைத்தார். இதை அறிந்த விஷ்ணு, வாமனர் (குள்ளன்) அவதாரம் எடுத்து, மகாபலியிடம் மூன்றடி மண் தானமாகக் கேட்டார். மகாபலியும் அதனை தாராளமாக வழங்க, வாமனர் தன் உருவை பிரமாண்டமாக மாற்றினார். முதல் அடியில் பூமியையும், இரண்டாம் அடியில் விண்ணையும் அளந்த அவர், மூன்றாவது அடியை வைப்பதற்கு இடம் இல்லாததால், மகாபலி தன் தலையையே சமர்ப்பித்தார். மகாபலியின் நற்குணங்களால் நெகிழ்ந்த விஷ்ணு, ஆண்டுதோறும் திருவோண நாளில் தன் மக்களைக் காண பூலோகம் வரலாம் என வரம் அளித்தார். அந்த நாளை நினைவு கூர்ந்து, மக்கள் தங்கள் மன்னனை வரவேற்கும் விதமாக ஓணம் கொண்டாடுகிறார்கள்.
களைகட்டும் 10 நாள் திருவிழா
ஓணம் பண்டிகை வெறும் ஒருநாள் கொண்டாட்டம் அல்ல; இது பத்து நாட்கள் நீடிக்கும் ஒரு பிரமாண்ட விழா. ஒவ்வொரு நாளுக்கும் தனித்தனி பெயரும், சிறப்பம்சங்களும் உள்ளன. முதல் நாளான அத்தம் அன்று வீட்டின் முன் மலர்களால் அத்தப்பூ கோலமிட்டு கொண்டாட்டங்கள் தொடங்குகின்றன. இந்த கோலங்கள் ஒவ்வொரு நாளும் பெரியதாகிக்கொண்டே போய், திருவோண நாளில் முழு வடிவம் பெறுகின்றன. ஓணத்தை வரவேற்க மக்கள் புதிய ஆடைகள் அணிந்து, வீடுகளை அழகுபடுத்துகின்றனர். ஆண்களுக்கு முண்டு, பெண்களுக்கு கசவு எனப்படும் வெள்ளை மற்றும் தங்க நிற பார்டருடன் கூடிய புடவை என பாரம்பரிய உடைகள் அணிந்து மகிழ்கின்றனர்.
பாரம்பரிய விளையாட்டுகளும் கலைநிகழ்ச்சிகளும்
More Read
ஓணத்தின் சிறப்பம்சங்களில் ஒன்று, அதன் பாரம்பரிய கலை நிகழ்ச்சிகள் மற்றும் விளையாட்டுகள். குறிப்பாக, புலிக்களி நடனம் மிக பிரபலமானது. சிவப்பு, கருப்பு, மஞ்சள் வண்ணங்களில் புலி வேடமிட்டு, ஆண்கள் நடனமாடுவது காண்போரை மெய்சிலிர்க்க வைக்கும். அத்துடன், கயிறு இழுத்தல் போட்டி, வல்லம்களி எனப்படும் பாரம்பரிய படகுப் பந்தயம் போன்ற வீர விளையாட்டுகளும் களைகட்டுகின்றன. இவற்றுடன், பெண்கள் கைகோர்த்து வட்டமாக ஆடும் கைகொட்டுக்களி நடனம் ஓணம் கொண்டாட்டத்திற்கு மேலும் அழகு சேர்க்கிறது.
அறுசுவை விருந்தான ஓணசத்யா
“காணம் விற்றாவது ஓணம் உண்” (கடன் வாங்கியாவது ஓணம் விருந்து உண்) என்ற பழமொழி, ஓணசத்யாவின் சிறப்பை உணர்த்துகிறது. திருவோண நாளில், தலைவாழை இலையில் அறுசுவை உணவுகளுடன் கூடிய பிரமாண்ட சைவ விருந்து பரிமாறப்படுகிறது. அரிசி சாதம், சாம்பார், அவியல், எரிசேரி, பச்சடி, கிச்சடி, இஞ்சிப் புளி, பால் பாயசம், அடை பிரதமன் என சுமார் 20-க்கும் மேற்பட்ட உணவு வகைகள் இந்த விருந்தில் இடம்பெறுகின்றன. இது வெறும் உணவு மட்டுமல்ல; கேரளாவின் வளத்தையும், கலாச்சாரத்தையும் வெளிப்படுத்தும் ஒரு கலைப்படைப்பு. சாதி, மத வேறுபாடின்றி அனைவரும் ஒன்றாக அமர்ந்து இந்த விருந்தை உண்பது, கேரள மக்களின் ஒற்றுமையை பறைசாற்றுகிறது.
உணர்வுகளின் சங்கமமே ஓணம்!
ஓணம் வெறும் அறுவடைத் திருவிழா மட்டுமல்ல; இது மனிதநேயம், ஒற்றுமை, பாரம்பரியம் ஆகியவற்றை போற்றும் ஒரு அற்புதமான உணர்வுபூர்வமான கொண்டாட்டம். மன்னன் மகாபலியின் ஆட்சி சிறப்பை நினைவு கூர்வதும், விருந்தோம்பலை மதிப்பதும், இயற்கையை வணங்குவதும் என ஒவ்வொரு செயலிலும் கேரள மக்களின் பெருமைமிகு கலாசாரம் பொதிந்துள்ளது. இந்த பண்டிகை கேரளாவில் மட்டுமின்றி, உலகெங்கும் வாழும் மலையாளிகளால் கொண்டாடப்படுகிறது.
