இந்தியாவில் கிர்கிஸ் குடியரசின் முதல் அலுவலகம்: தமிழ்நாட்டிற்கு கிடைத்த கௌரவம்
சென்னை: கிர்கிஸ் குடியரசின் முதல் கௌரவ தூதரகம் தமிழ்நாட்டின் தலைநகரான சென்னையில் இன்று (செப்டம்பர் 29, 2025) அதிகாரபூர்வமாகத் திறக்கப்பட்டுள்ளது. இந்த முக்கியத்துவம் வாய்ந்த ராஜதந்திர நடவடிக்கை, மத்திய ஆசிய நாடான கிர்கிஸ் குடியரசுக்கும், இந்தியாவின் வர்த்தக மற்றும் கல்வி மையமான தமிழ்நாட்டிற்கும் இடையேயான உறவுகளை வலுப்படுத்தும் நோக்கில் எடுக்கப்பட்டுள்ளது.
இந்த கௌரவ தூதரக அலுவலகம் கிர்கிஸ் குடியரசின் ஒட்டுமொத்த தென்னிந்திய பிராந்தியத்திற்கான முதல் பிரதிநிதித்துவம் ஆகும். மேலும், தற்போது இந்தியா முழுவதிலும் உள்ள கிர்கிஸ் குடியரசின் ஒரேயொரு கௌரவ தூதரகமும் இதுதான் என்பது குறிப்பிடத்தக்கது.
ராஜதந்திர உறவுகளை வலுப்படுத்தும் புதிய பாலம்
இந்த புதிய அலுவலகத்தின் தலைவராக, உலகளவில் புகழ்பெற்ற விஞ்ஞானியும், தொழில்முனைவோருமான டாக்டர். பிரகாஷ் ராவ் வெங்கட ரமணா துவ்வூரி கௌரவ தூதராக நியமிக்கப்பட்டுள்ளார். கால்நடை ஊட்டச்சத்து, தீவன தொழில்நுட்பம் மற்றும் திடக் கழிவு மேலாண்மை ஆகியவற்றில் முன்னோடியாகத் திகழும் இவர், இந்த புதிய பொறுப்புக்கு நியமிக்கப்பட்டுள்ளார். இவருக்கு இந்திய கால்நடை மருத்துவ கவுன்சில் உள்ளிட்ட சர்வதேச நிறுவனங்கள் பல வாழ்நாள் சாதனையாளர் விருதுகளை வழங்கி கௌரவித்துள்ளன.
திறப்பு விழாவில் கிர்கிஸ் குடியரசின் இந்தியா, இலங்கை மற்றும் நேபாளத்திற்கான அசாதாரண மற்றும் முழு அதிகாரம் கொண்ட தூதர் அஸ்கர் பெஷிமோவ் அவர்கள் தலைமை தாங்கி, இந்த புதிய அத்தியாயத்திற்கு தனது ஆதரவையும் வாழ்த்துக்களையும் தெரிவித்தார். தூதர் பெஷிமோவ் பேசுகையில், “இந்த கௌரவ தூதரகம் வர்த்தகம், கலாச்சாரம் மற்றும் கல்விப் பரிமாற்றங்களை ஆதரிக்கும். கிர்கிஸ்தானில் படிக்கவோ அல்லது தொழில் செய்யவோ விரும்பும் இந்திய குடிமக்களுக்கு இது ஒரு பாலமாக செயல்படும். விரைவில், இண்டிகோ ஏர்லைன்ஸ் மூலம் டெல்லிக்கும் பிஷ்கெக்கிற்கும் இடையே நேரடி விமான சேவையைத் தொடங்கவுள்ளோம். இது சுற்றுலா, வர்த்தகம் மற்றும் மக்கள் தொடர்புகளை மேலும் அதிகரிக்கும்,” என்று நம்பிக்கை தெரிவித்தார்.
More Read
கல்வி, வர்த்தகம் மற்றும் முதலீடுகளுக்கான வாய்ப்புகள்
புதிய கௌரவ தூதர் டாக்டர். துவ்வூரி பேசுகையில், “இந்த அலுவலகம் வெறும் இராஜதந்திரத்தைப் பற்றியது மட்டுமல்ல, நட்பு, வாய்ப்பு மற்றும் முன்னேற்றத்திற்கான பாலங்களை உருவாக்குவதாகும். தமிழ்நாடு எப்போதும் அறிவு, தொழில்முனைவு மற்றும் கலாச்சாரத்தின் மையமாக உள்ளது. அதன் மூலோபாய இருப்பு மற்றும் ஆற்றல் வாய்ந்த கிர்கிஸ்தான் ஆகியவை ஒத்துழைப்பிற்கு புதிய வழிகளைத் திறக்கின்றன,” என்றார். கிர்கிஸ்தானில் மருத்துவக் கல்வி பயிலும் இந்திய மாணவர்களுக்கு இந்த அலுவலகம் மிகக் குறைந்த செலவில் உதவிகரமாக இருக்கும் என்று அவர் குறிப்பிட்டார். கிர்கிஸ்தானில் பாதுகாப்பு மற்றும் ஸ்திரத்தன்மை மிக நன்றாக உள்ளது, இது இந்திய மாணவர்களுக்கு ஒரு சாதகமான அம்சமாகும் என்றும் அவர் கூறினார்.
டாக்டர். துவ்வூரி தனது முக்கிய நோக்கம், வர்த்தக மற்றும் முதலீடுகளை ஈர்ப்பதுதான் என்றும், குறிப்பாக மருத்துவ சுற்றுலாவுக்கு மிகச் சிறந்த வாய்ப்புகள் இருப்பதாகவும் தெரிவித்தார்.
முக்கிய துறைகளில் ஒத்துழைப்புக்கான இலக்கு
இந்த கௌரவ தூதரக அலுவலகம், கிர்கிஸ் குடிமக்களுக்கு தேவையான உதவிகளை வழங்குவதுடன், இரு பிராந்தியங்களுக்கும் இடையே வணிகத் தொடர்புகளை எளிதாக்குதல், கல்வி மற்றும் கலாச்சாரப் பரிமாற்றங்களை மேம்படுத்துதல் ஆகியவற்றை நோக்கமாகக் கொண்டுள்ளது. மேலும், அறிவியல், தொழில்நுட்பம், சுகாதாரம், புதுப்பிக்கத்தக்க எரிசக்தி, விவசாயம் மற்றும் சுற்றுலா போன்ற முக்கிய துறைகளில் ஒத்துழைப்பை அதிகரிக்க இது ஒரு பாலமாகச் செயல்படும்.
More Read
வரவிருக்கும் காலத்தில் மும்பை மற்றும் பெங்களூரு போன்ற முக்கிய நகரங்களிலும் கௌரவ தூதரகங்களைத் திறக்க கிர்கிஸ் குடியரசு திட்டமிட்டுள்ளது என்றாலும், இந்தியாவில் கிர்கிஸ் குடியரசின் முதல் கௌரவ தூதரகம் சென்னையில் தொடங்கப்பட்டுள்ளது தமிழ்நாட்டிற்கு கிடைத்த ஒரு பெரிய கௌரவமாகக் கருதப்படுகிறது. தமிழ்நாட்டின் மொத்த உள்நாட்டு உற்பத்தியில் (GDP) குறிப்பிடத்தக்க பங்களிப்பு இருப்பதால், இந்த அலுவலகம் தமிழ்நாட்டிற்கு ஒரு பெருமையான தருணம் என்றும் டாக்டர். துவ்வூரி குறிப்பிட்டார். இந்த புதிய தொடக்கம், இரு நாடுகளின் கலாச்சார உறவுகளுக்கும், பொருளாதார வளர்ச்சிக்கும் ஒரு புதிய சகாப்தத்தை அமைக்கும் என்பதில் சந்தேகமில்லை.
