அமெரிக்காவில் அதிபர் டொனால்ட் ட்ரம்பின் நிர்வாகத்திற்கு எதிராகவும், அவர் தன்னை ஒரு மன்னராக சித்தரித்துக்கொள்வதாகவும் கூறி நாடு தழுவிய அளவில் ‘No Kings’ (மன்னர்கள் இல்லை) என்ற பெயரில் போராட்டங்கள் வெடித்துள்ளன. இந்த ஆர்ப்பாட்டங்கள் ட்ரம்பின் 79வது பிறந்தநாளும், அமெரிக்க ராணுவத்தின் 250வது ஆண்டு விழாவை ஒட்டி நடத்தப்பட்ட ராணுவ அணிவகுப்பும் நடைபெற்ற அதே நாளில் நடத்தப்பட்டன. இந்த போராட்டங்களில் மார்க் ரஃபலோ, ஜிம்மி கிம்மெல், கெர்ரி வாஷிங்டன், ஜூலியா லூயிஸ்-டிரேஃபஸ், க்ளென் க்ளோஸ், சூசன் சரண்டன் உள்ளிட்ட ஏராளமான ஹாலிவுட் பிரபலங்கள் கலந்துகொண்டு தங்கள் ஆதரவை வெளிப்படுத்தி வருகின்றனர்.
“50501 இயக்கம்” என்ற அமைப்பு இந்த போராட்டங்களை ஒருங்கிணைத்து வருகிறது. 50 மாநிலங்கள், 50 போராட்டங்கள், ஒரே இயக்கம் என்பதே இதன் பொருள். அதிபர் ட்ரம்ப் தனது அதிகாரத்தை தவறாகப் பயன்படுத்துவதாகவும், ஜனநாயகத்திற்கு அச்சுறுத்தலாக இருப்பதாகவும் போராட்டக்காரர்கள் குற்றம் சாட்டுகின்றனர். குறிப்பாக, ட்ரம்ப் தனது இரண்டாவது பதவிக் காலத்தில் தன்னை ஒரு “மன்னராக” கருதுவதாகவும், ஜனநாயக விழுமியங்களை மீறுவதாகவும் அவர்கள் கருதுகின்றனர். சமீபகாலமாக ட்ரம்ப் நிர்வாகம் மேற்கொண்ட குடியேற்றத் துறை தொடர்பான கடும் நடவடிக்கைகள் மற்றும் ராணுவத்தை பயன்படுத்தி போராட்டங்களை ஒடுக்கும் முயற்சிகள் ஆகியவை இந்தப் போராட்டங்களுக்கு மேலும் தூண்டுகோலாக அமைந்தன. லாஸ் ஏஞ்சல்ஸ் போன்ற நகரங்களில் நடைபெற்ற குடியேற்ற எதிர்ப்புப் போராட்டங்களுக்கு ட்ரம்ப் தேசிய காவல்படை மற்றும் மரைன் படையினரை அனுப்பியதும் இந்த எதிர்ப்புகளை வலுப்படுத்தியுள்ளது.
நியூயார்க்கில் நடந்த போராட்டத்தில் கலந்துகொண்ட நடிகர் மார்க் ரஃபலோ, “நமது ஜனநாயகம் பெரும் சிக்கலில் உள்ளது. தற்போதுள்ள நிர்வாகத்திற்கு எதிராக வலிமையான எதிர்ப்பு சக்தி இல்லை. நாங்கள் வெறுப்படைந்திருக்கிறோம், பயந்திருக்கிறோம். இதை எதிர்த்துப் போராட மக்கள் ஒன்றாக வர வேண்டும்” என்று கூறி தனது கவலையை வெளிப்படுத்தினார். பிரபல தொலைக்காட்சி தொகுப்பாளர் ஜிம்மி கிம்மெல் சான் பிரான்சிஸ்கோவில் தனது பெற்றோருடன் போராட்டத்தில் கலந்துகொண்டார். அவர், “இந்த நாட்டை நேசிக்கும் மற்றும் அது ஒரு நல்ல சக்தியாக இருக்க முடியும் என்று நம்பும் பலரை நான் சந்தித்தேன். ‘ஒருவருக்கொருவர் அன்பு செலுத்துங்கள்’ என்பதே மிக முக்கியமான வார்த்தைகள்” என்று தனது இன்ஸ்டாகிராம் பக்கத்தில் பதிவிட்டுள்ளார்.
மேலும், நடிகை கெர்ரி வாஷிங்டன் தனது இன்ஸ்டாகிராம் பக்கத்தில், “#NoKings, ஜனநாயகத்திற்காக அணிவகுத்து, குரல் கொடுத்து, போராடும் சில QUEENSகளைக் கண்டேன்” என்று பதிவிட்டுள்ளார். அயோ எடெபிரரி, நடாஷா ராத்வெல், ஜூலியா லூயிஸ்-டிரேஃபஸ் போன்ற பிரபலங்களும் தங்கள் சமூக வலைத்தளங்களில் போராட்டத்திற்கு ஆதரவான கருத்துக்களைப் பகிர்ந்துள்ளனர். ஜூலியா லூயிஸ்-டிரேஃபஸ் “நான் விரும்பும் ஒரே மன்னன் ஒரு பட்டாம்பூச்சிதான்” என்று ஒரு சுவாரஸ்யமான பதாகையுடன் போராட்டத்தில் கலந்துகொண்டார்.
இந்தப் போராட்டங்கள் அமெரிக்காவின் ஜனநாயகப் பண்புகளைப் பாதுகாக்கவும், ஆட்சி அதிகாரம் மக்கள் கையில் இருப்பதை மீண்டும் வலியுறுத்தவும் நடத்தப்படுகின்றன. அதிபர் ட்ரம்பின் நடவடிக்கைகள் ஒரு மன்னரைப் போல இருப்பதாகவும், இது அமெரிக்க அரசியலமைப்புச் சட்டத்திற்கு எதிரானது என்றும் போராட்டக்காரர்கள் வாதிடுகின்றனர். யூட்டாவில் நடைபெற்ற ‘No Kings’ போராட்டத்தில் துப்பாக்கிச் சூடு சம்பவம் நிகழ்ந்து, ‘ப்ராஜெக்ட் ரன்வே’ புகழ் ஆடை வடிவமைப்பாளர் ஆர்தர் ஃபோலாசா ஆ லூ உயிரிழந்தது இந்த போராட்டத்தின் தீவிரத்தை மேலும் அதிகரித்துள்ளது. இது அரசியல் சுதந்திரம் மற்றும் மக்களின் குரலின் முக்கியத்துவத்தை மீண்டும் ஒருமுறை அமெரிக்காவின் களத்தில் உணர்த்தியுள்ளது.
