ஆசியாவின் உயரிய விருதாகக் கருதப்படும் ரமோன் மகசேசே விருது, இந்த ஆண்டு இந்தியாவைச் சேர்ந்த ‘Educate Girls’ என்ற தன்னார்வ தொண்டு நிறுவனத்திற்கு வழங்கப்பட்டுள்ளது. இந்த அமைப்பின் முன்னோடிப் பணிகளுக்காக, இந்த விருதுக்குத் தேர்வான முதல் இந்திய அமைப்பு என்ற பெருமையையும் இது பெற்றுள்ளது. பிலிப்பைன்ஸ் முன்னாள் அதிபர் ரமோன் மகசேசேவின் நினைவாக ஆண்டுதோறும் வழங்கப்படும் இந்த விருது, கல்வித் துறையில் ‘Educate Girls’ செய்து வரும் புரட்சிகரமான மாற்றங்களுக்காக வழங்கப்பட்டுள்ளது.
2007-ம் ஆண்டு சமூக சேவகர் ஷபீனா ஹுசைனால் தொடங்கப்பட்ட இந்த அமைப்பு, பெண்களின் கல்விக்கு முக்கியத்துவம் அளித்து வருகிறது. கிராமப்புறங்களில் உள்ள பெண் குழந்தைகள் பள்ளிக்குச் செல்லுவதை உறுதி செய்து, அவர்களின் கல்விப் பயணத்தில் ஒரு துணையாக இருக்கிறது. குறிப்பாக, இந்தியாவின் மிகவும் பின்தங்கிய மற்றும் கல்வி வாய்ப்புகள் குறைந்த பகுதிகளில், இந்தக் கல்விப் பணி மிகவும் முக்கியத்துவம் வாய்ந்தது. மத்திய அரசின் நிதியுதவியுடன் பல கல்வித் திட்டங்களை வெற்றிகரமாகச் செயல்படுத்தி, 67 லட்சத்திற்கும் அதிகமான மாணவிகளின் வாழ்க்கையில் கல்வி ஒளியைப் பாய்ச்சியுள்ளது. சுமார் 13,000 தன்னார்வலர்களைக் கொண்ட ‘டீம் பாலிகா’ என்ற ஒரு மிகப்பெரிய குழு, இந்த அமைப்பின் முதுகெலும்பாகச் செயல்படுகிறது. அவர்கள் கிராமம் கிராமமாகச் சென்று, பெண் குழந்தைகளின் பெற்றோர்களுடன் பேசி, அவர்களின் மகள்களைப் பள்ளிக்கு அனுப்புவதன் முக்கியத்துவத்தை எடுத்துரைக்கிறார்கள்.
இந்த விருதைப் பெற்றுக் கொண்ட ‘Educate Girls’ நிறுவனத்தின் நிறுவனர் ஷபீனா ஹுசைன், “இந்த விருது, இந்தியாவின் அடித்தளத்தில் இருந்து உருவாகும் பெண்கள் கல்வி இயக்கத்தை உலக அளவில் கொண்டு சென்றுள்ளது. இது ஒரு தனிநபரின் முயற்சி அல்ல, ஒட்டுமொத்த சமூகமும் இணைந்து ஒரு சிறுமியின் வாழ்க்கையில் ஒளியேற்றும் மிகப்பெரிய இயக்கம்” என்று நெகிழ்ச்சியுடன் தெரிவித்தார். அவர் மேலும் கூறுகையில், “எங்கள் அடுத்த இலக்கு, அடுத்த பத்து ஆண்டுகளில் ஒரு கோடி மாணவிகளுக்குக் கல்வி வழங்குவது” என்றும் உறுதியளித்தார்.
‘Educate Girls’ அமைப்பின் தலைமைச் செயல் அதிகாரி காயத்ரி நாயர் லோபோ, “இந்த விருது, அரசு, நன்கொடை அளிக்கும் நிறுவனங்கள், பெரு நிறுவனங்கள் மற்றும் சமூகத்தினர் என அனைவரும் இணைந்து செயல்படும்போது சாத்தியமாகும் மாற்றத்தை உலகிற்கு உணர்த்துகிறது. கல்வி என்பது ஒவ்வொரு குழந்தைக்கும் கிடைக்க வேண்டிய அடிப்படை உரிமை” என்று வலியுறுத்தினார்.
இந்த வரலாற்றுச் சிறப்புமிக்க விருது, சத்யஜித் ரே, எம்.எஸ்.சுப்புலட்சுமி, கிரண் பேடி, வினோபா பாவே போன்ற இந்திய ஆளுமைகளின் வரிசையிலும், அன்னை தெரசா, தலாய் லாமா போன்ற உலக நாயகர்களின் வரிசையிலும் இப்போது ‘Educate Girls’ அமைப்பைச் சேர்த்துள்ளது. “ஒரு பெண் கல்வி பெறும்போது, அவள் முழுச் சமூகத்தையும் மேம்படுத்துகிறாள்” என்ற உயரிய தத்துவத்தை இந்த அமைப்பு அதன் செயல்பாடுகள் மூலம் நிரூபித்துள்ளது.
More Read
இதே ஆண்டுக்கான ரமோன் மகசேசே விருதுக்குத் தேர்வான மற்றவர்கள், மாலத்தீவுகளைச் சேர்ந்த சமூகச் செயற்பாட்டாளர் ஷாஹீனா அலி மற்றும் பிலிப்பைன்ஸின் அருட்தந்தை பிளவியானோ வில்லனுவா ஆகியோர். பிளாஸ்டிக் மாசுபாட்டிற்கு எதிராகப் போராடி வரும் ஷாஹீனா அலியும், ஏழை மற்றும் வீடற்ற மக்களுக்காகத் தன் வாழ்வை அர்ப்பணித்த அருட்தந்தை பிளவியானோவும் இந்த உயரிய விருதைப் பெற உள்ளனர். இந்த விருதுகள், நவம்பர் 7, 2025 அன்று மனிலாவில் நடைபெறும் விழாவில் அவர்களுக்கு வழங்கப்படும்.
