தூத்துக்குடியைச் சேர்ந்த தொழிலதிபர் குகன் சக்கரவர்த்தியார், ஊர்மக்களால் ‘அண்ணாச்சி’ என அழைக்கப்படும் பெரிய செல்வந்தர். சொத்து, செல்வாக்கு எல்லாம் இருந்தாலும், குடும்ப வாழ்க்கையில் ஏற்பட்ட சிக்கல்கள் அவரது மனதை உடைக்கின்றன.
திருமணமான முதல் இரவே இல்லற வாழ்க்கையில் சோதனை சந்திக்கும் அவர், மனவேதனையுடன் வங்காள விரிகுடா கடற்கரையில் தனிமையில் தவிக்கும் தருணத்தில், ஒரு இளம் பெண் தற்கொலைக்கு முயல்வதை காண்கிறார்.
அவளை காப்பாற்றும் குகனுக்கு, அந்தப் பெண் தனது முன்னாள் காதலி என்பதும் தெரிய வருகிறது.
அவளது வாழ்க்கைச் சூழலை உணர்ந்து, அவளுடன் வாழ முடிவு செய்யும் குகன், அந்தப் பயணத்தில் அவளுக்காக ஒரு கொலை செய்ய வேண்டிய கட்டாயத்திலும் சிக்குகிறார். அதன்பிறகு கதை புதிய திசை நோக்கி நகர்கிறது. கொலை செய்யப்பட்ட நபர் மரணத்திற்குப் பிறகும் தொலைபேசி மூலம் காதலியையும் குகனையும் மிரட்டத் தொடங்குவது, படத்தில் அமானுஷ்ய சாயலை கொண்டு வருகிறது. இந்த மர்மத்தின் பின்னணி என்ன, அதிலிருந்து குகன் எவ்வாறு மீள்கிறார் என்பதே படத்தின் மீதிக் கதை.
இந்தப் படத்தின் முக்கிய கவன ஈர்ப்பு, கதை, திரைக்கதை, வசனம், இயக்கம், இசை, ஒளிப்பதிவு உள்ளிட்ட 21 தொழில்நுட்ப துறைகளையும் ஒரே நபராக கையாண்டு கின்னஸ் சாதனைக்கு முயற்சித்துள்ள இயக்குநர் – நாயகன் குகன் சக்கரவர்த்தியாரின் துணிச்சலான முயற்சி. இந்த ‘ஒன் மேன் ஆர்மி’ அணுகுமுறை பாராட்டுக்குரியதாக இருந்தாலும், அதே நேரத்தில் சில இடங்களில் அதன் வரம்புகளும் வெளிப்படுகின்றன.
நடிப்பில், மனைவியிடம் அன்பும், முன்னாள் காதலியிடம் அர்ப்பணிப்பும் கொண்ட மனிதராக குகன் சக்கரவர்த்தியார் கதாபாத்திரத்திற்கு பொருத்தமாக நடித்துள்ளார். சண்டைக் காட்சிகளில் ஆவேசம் வெளிப்படுகிறது. இரண்டு நாயகிகளும் அவரை மையமாக வைத்து நகரும் பாத்திரங்களாகவே வடிவமைக்கப்பட்டுள்ளனர். அவர்களுடனான காதல் காட்சிகள் ரசிக்க வைக்கின்றன.
அனுபவ நடிகர்களான வாசு விக்ரம், வையாபுரி, பொன்னம்பலம் ஆகியோர் தங்களுக்கான காட்சிகளில் படத்திற்கு தேவையான ஆதரவைக் கொடுக்கிறார்கள். மற்ற துணைப் பாத்திரங்கள் பெரிதாக மனதில் பதியவில்லை.
ஒளிப்பதிவும் இசையும் படத்தின் முக்கிய பலமாக இருக்கின்றன. பாடல்கள் கவனிக்க வைக்கும் வகையில் அமைந்துள்ளன. அதே நேரத்தில் ஆக்ஷன், சஸ்பென்ஸ், அமானுஷ்யம், குடும்ப உணர்ச்சி, அரசியல் என பல்வேறு ஜானர்களை ஒரே படத்தில் அடுக்க முயன்றதால், திரைக்கதை சில இடங்களில் குழப்பத்தை ஏற்படுத்துகிறது. சில காட்சிகளில் செயற்கைத்தனமான நடிப்பும், கதை நகர்வில் சுவாரசியம் குறைவதும் படத்தின் பலவீனங்களாக தெரிகின்றன.
கிளைமாக்சில் மறைந்த அப்துல் கலாமின் கருத்துகள் மூலம் நாயகன் மனம் மாறும் பகுதி உணர்வுபூர்வமான முடிவை வழங்குகிறது. மேலும் மெரினா கடற்கரைக்கு ‘திராவிடக் கடல்’ என பெயர் மாற்றம் செய்ய வேண்டும் என்ற அரசியல் கோரிக்கையுடன் படம் நிறைவு பெறுவது, இயக்குநரின் சிந்தனையை வெளிப்படுத்தும் முயற்சியாக அமைந்துள்ளது.
மொத்தத்தில், ‘வங்காள விரிகுடா’ என்பது முயற்சியில் பெரியது; ஆனால் அதே அளவிலான திரைக்கதை துல்லியம் மற்றும் காட்சியமைப்பு இருந்திருந்தால் இன்னும் வலுவான படமாக மாறியிருக்கும் என்ற உணர்வையே படம் விட்டுச் செல்கிறது.
