மங்களூருவின் இளம் சாதனையாளர்: ரிதுபர்ணா கே.எஸ்.
கர்நாடக மாநிலம் மங்களூருவைச் சேர்ந்த 20 வயது ரிதுபர்ணா கே.எஸ்., கல்லூரிப் படிப்பை முடிப்பதற்கு முன்பே உலகப் புகழ்பெற்ற ரோல்ஸ் ராய்ஸ் நிறுவனத்தில் ஆண்டுக்கு ரூ.72.3 லட்சம் சம்பளத்தில் வேலைக்குச் சேர்ந்து அனைவரது கவனத்தையும் ஈர்த்துள்ளார். நீட் தேர்வில் அதிக மதிப்பெண் பெறாததால் மருத்துவர் ஆக வேண்டுமென்ற அவரது கனவு தகர்ந்தபோதும், மனம் தளராமல் பொறியியல் படிப்பில் இணைந்து, தனது அயராத உழைப்பு மற்றும் தன்னம்பிக்கையால் சாதித்து இளைஞர்களுக்கு உத்வேகம் அளித்துள்ளார். ரிதுபர்ணாவின் இந்தச் சாதனை, ஒரு துறையில் ஏற்படும் தோல்வி மற்றொரு துறையில் மகத்தான வெற்றிக்கு வழிவகுக்கும் என்பதற்கு ஒரு சிறந்த எடுத்துக்காட்டாகும்.
மருத்துவக் கனவிலிருந்து பொறியியல் பாதைக்கு
சரேஷ் மற்றும் கீதா தம்பதியரின் மூத்த மகளாகப் பிறந்தவர் ரிதுபர்ணா. இவருக்கு ரித்விகா என்ற சகோதரியும் உள்ளார். சிறுவயது முதலே மருத்துவர் ஆக வேண்டுமென்ற கனவில் ரிதுபர்ணா இருந்துள்ளார். நீட் தேர்வில் எதிர்பார்த்த வெற்றியைப் பெற முடியாததால், அவருக்கு அரசு மருத்துவக் கல்லூரியில் இடம் கிடைக்கவில்லை. இதனால் சிறிது சோர்வடைந்தாலும், ரிதுபர்ணா தனது எதிர்காலத்தை நம்பிக்கையுடன் அணுகினார். மருத்துவக் கனவு கைகூடாத நிலையில், ரோபாட்டிக்ஸ் மற்றும் ஆட்டோமேஷன் பொறியியல் படிப்பைத் தேர்ந்தெடுத்து புதிய அத்தியாயத்தைத் தொடங்கினார். ஆரம்பத்தில் பொறியியல் படிப்பில் தயக்கம் காட்டிய ரிதுபர்ணா, பின்னர் தனது பாடப்பிரிவில் அதீத ஆர்வம் காட்டத் தொடங்கினார்.
முதல் வெற்றியும் ரோல்ஸ் ராய்ஸ் கனவும்
தனது பொறியியல் படிப்பின் ஒரு பகுதியாக, ரிதுபர்ணாவின் முதல் திட்டத்தின் நோக்கம், ரோபாட்டிக்ஸ் மூலம் பாக்கு விவசாயிகள் எதிர்கொள்ளும் பிரச்சினைகளைத் தீர்ப்பதாகும். ஒரு குழுவுடன் சேர்ந்து, கோவா INEX போட்டியில் அறுவடை இயந்திரம் மற்றும் தெளிப்பான் மாதிரியை உருவாக்கி சமர்ப்பித்தார். இந்த புதிய கண்டுபிடிப்பு அவருக்கு தங்கம் மற்றும் வெள்ளிப் பதக்கங்களை வெல்ல வழிவகுத்தது. இந்த வெற்றி அவருக்கு மேலும் தன்னம்பிக்கையையும் ஊக்கத்தையும் அளித்தது. இதையடுத்து, உலகப் புகழ்பெற்ற ரோல்ஸ் ராய்ஸ் நிறுவனத்திடம் இன்டர்ன்ஷிப் செய்ய வேண்டும் என்ற விருப்பத்துடன் அவர்களைத் தொடர்புகொண்டார். ஆரம்பத்தில் அந்த நிறுவனத்திடம் இருந்து ஏமாற்றமான பதிலே அவருக்குக் கிடைத்தது. “எங்கள் நிறுவனத்தில் ஒரு பகுதியாக இருக்க உங்களுக்குத் தகுதி இருக்கிறதா?” என்று அவர்கள் கேட்டபோது, “எந்த ஒரு பணியைக் கொடுத்தாலும் அதை முடிப்பதில் எனக்கு நம்பிக்கை உள்ளது” என்று ரிதுபர்ணா உறுதியாகத் தெரிவித்துள்ளார்.
More Read
கடின உழைப்பின் பலன்: ரோல்ஸ் ராய்ஸில் பணி நியமனம்
ரோல்ஸ் ராய்ஸ் நிறுவனத்திடம் இருந்து ஒரு சிறிய பகுதி வேலை ரிதுபர்ணாவுக்குக் கொடுக்கப்பட்டது. முதலில் அவருக்குப் புரியவில்லை என்றாலும், ரிதுபர்ணா தனது தீவிர முயற்சி மற்றும் ஆராய்ச்சி மூலம் அதனை வெற்றிகரமாக முடித்தார். தொடர்ந்து 8 மாதங்கள் எண்ணற்ற சவால்கள் மற்றும் கடினமான நேர்காணல்களை எதிர்கொண்டார். ஜனவரி மாதம் முதல் நள்ளிரவு முதல் காலை வரை ரிதுபர்ணா ரோல்ஸ் ராய்ஸ் நிறுவனத்தில் ஆன்லைன் மூலம் பயிற்சி பெற்று வந்தார். அதன்பிறகு கல்லூரி வகுப்புகளில் கவனம் செலுத்தி வந்தார். ரிதுபர்ணாவின் இந்தத் தீவிர முயற்சியின் தொடர்ச்சியாக, அவருக்கு ரோல்ஸ் ராய்ஸ் நிறுவனத்தில் ஆண்டுக்கு ரூ.72.3 லட்சம் சம்பளத்தில் வேலை கிடைத்துள்ளது. பொறியியல் படிப்பின் இறுதி செமஸ்டர் முடிந்ததும், அமெரிக்காவில் உள்ள நிறுவனத்தின் டெக்சாஸ் பிரிவில் அவர் பணியில் சேர உள்ளார். ரிதுபர்ணாவின் இந்தச் சாதனை, விடாமுயற்சி மற்றும் தன்னம்பிக்கை இருந்தால் எந்தக் கனவையும் அடையலாம் என்பதற்குச் சிறந்த உதாரணமாகும்.
