தமிழகச் சட்டமன்றத் தேர்தல் 2026-க்கான அனல் பறக்கும் பிரச்சாரங்கள் மற்றும் வாக்குப் பதிவு நிறைவடைந்துள்ள நிலையில், திமுக தலைவரும் தமிழக முதல்வருமான மு.க. ஸ்டாலின், தனது வழக்கமான ‘தேர்தல் ஓய்வு’க்காக நாளை (ஏப்ரல் 25) கொடைக்கானல் செல்லத் திட்டமிட்டுள்ளார். தேர்தலுக்குப் பிந்தைய இந்த மலைப்பிரதேசப் பயணம், முதல்வர் ஸ்டாலினுக்கு ஒரு ராசியான சென்டிமென்டாகவே பார்க்கப்படுகிறது. கடந்த 2019 மற்றும் 2024 நாடாளுமன்றத் தேர்தல்கள், அதேபோல் 2021 சட்டமன்றத் தேர்தல் என முக்கியமான மூன்று தேர்தல்கள் முடிந்த கையோடு அவர் கொடைக்கானல் சென்று ஓய்வெடுத்தார். அந்த மூன்று தேர்தல்களிலும் திமுக கூட்டணி மிகப்பெரிய வெற்றியைப் பதிவு செய்தது குறிப்பிடத்தக்கது.
தற்போது 2026 சட்டமன்றத் தேர்தலும் வெற்றிகரமாக முடிந்துள்ள நிலையில், தேர்தல் முடிவுகள் வரும் மே 4-ம் தேதி வெளியாக உள்ளன. வாக்கு எண்ணிக்கை வரை சுமார் 10 நாட்கள் இடைவெளி இருப்பதால், இந்த ஓய்வு நேரத்தை குடும்பத்துடன் கழிக்கவும், தேர்தல் கால உடல் மற்றும் மனச்சோர்வைப் போக்கவும் அவர் கொடைக்கானல் செல்கிறார். அங்குள்ள தனியார் விடுதியில் தங்கும் அவர், வழக்கம்போல காலையில் நடைப்பயணம் மற்றும் கோல்ஃப் விளையாடுவது போன்ற செயல்களில் ஈடுபடுவார் என எதிர்பார்க்கப்படுகிறது.
இந்த முறையும் கொடைக்கானல் பயணம் அவருக்கு அதே வெற்றியைத் தரும் என்ற நம்பிக்கையில் திமுக தொண்டர்கள் உற்சாகமடைந்துள்ளனர். “வெற்றி நிச்சயம், அதற்கான முன் அறிவிப்புதான் இந்த கொடைக்கானல் பயணம்” என சமூக வலைதளங்களில் திமுகவினர் பதிவிட்டு வருகின்றனர். முதல்வரின் வருகையை முன்னிட்டு திண்டுக்கல் மாவட்ட காவல்துறை சார்பில் கொடைக்கானலில் பலத்த பாதுகாப்பு ஏற்பாடுகள் செய்யப்பட்டுள்ளன. முக்கிய சுற்றுலாத் தலங்களில் கூடுதல் போலீஸார் பாதுகாப்புப் பணியில் ஈடுபடுத்தப்பட உள்ளனர்.
இருப்பினும், முதல்வர் அங்கு இருந்தாலும், தமிழகத்தின் முக்கிய நிர்வாகப் பணிகள் மற்றும் தேர்தல் ஆணையத்தின் அடுத்தகட்ட நகர்வுகளை அவர் அங்கிருந்தே கவனிப்பார் எனத் தலைமைச் செயலக வட்டாரங்கள் தெரிவிக்கின்றன. சுமார் ஒரு வாரம் வரை அங்கு தங்கியிருக்கும் முதல்வர், மே 4-ம் தேதி வாக்கு எண்ணிக்கை தொடங்குவதற்கு முன்னதாகச் சென்னை திரும்புவார் என எதிர்பார்க்கப்படுகிறது. முதல்வரின் இந்த ‘சென்டிமென்ட்’ பயணம் அரசியல் வட்டாரத்தில் சுவாரஸ்யமான விவாதங்களை ஏற்படுத்தியுள்ளது.
