டெல்லி மதுபான கொள்கை முறைகேடு வழக்கில் இருந்து டெல்லி முன்னாள் முதலமைச்சர் அரவிந்த் கெஜ்ரிவால் மற்றும் ஆம் ஆத்மி கட்சியின் முக்கியத் தலைவர்கள் உள்ளிட்ட 23 பேரை நீதிமன்றம் இன்று அதிரடியாக விடுதலை செய்துள்ளது. கடந்த இரண்டு ஆண்டுகளுக்கும் மேலாக இந்திய அரசியலில் பெரும் புயலை ஏற்படுத்திய இந்த ஊழல் வழக்கில், போதிய ஆதாரங்கள் இல்லை எனக் கூறி நீதிமன்றம் வழங்கிய இந்தத் தீர்ப்பு, ஆம் ஆத்மி கட்சியினரிடையே பெரும் உற்சாகத்தை ஏற்படுத்தியுள்ளது.
நீதிமன்றத் தீர்ப்பும் விடுதலையும்: டெல்லி மதுபானக் கொள்கை வழக்கில் கைதாகி சிறையில் இருந்த அரவிந்த் கெஜ்ரிவால், முன்னாள் துணை முதலமைச்சர் மணீஷ் சிசோடியா, துர்கேஷ் பதக் மற்றும் தெலங்கானா முன்னாள் முதலமைச்சர் சந்திரசேகர ராவின் மகளான கே. கவிதா உள்ளிட்ட 23 பேரும் இன்று வழக்கிலிருந்து முழுமையாக விடுவிக்கப்பட்டனர். இந்த வரலாற்றுச் சிறப்புமிக்க தீர்ப்பை டெல்லி சிபிஐ சிறப்பு நீதிமன்றம் வழங்கியுள்ளது. நீண்ட சட்டப் போராட்டத்திற்குப் பிறகு கிடைத்துள்ள இந்த வெற்றி, வரவிருக்கும் தேர்தல்களில் ஆம் ஆத்மி கட்சிக்குப் பெரும் பலமாக அமையும் என எதிர்பார்க்கப்படுகிறது.
கண்ணீர் மல்க கெஜ்ரிவால் உருக்கம்: நீதிமன்ற வளாகத்திலேயே உணர்ச்சிவசப்பட்ட அரவிந்த் Kejriwal, செய்தியாளர்களைச் சந்தித்தபோது கண்கலங்கினார். “அமித் ஷாவும், மோடியும் இணைந்து ஆம் ஆத்மி கட்சியை வேரோடு ஒழிக்க மிகப்பெரிய சதித் திட்டத்தைத் தீட்டினார்கள். ஒரு மாநிலத்தின் முதலமைச்சராக இருந்த என்னை, எவ்வித ஆதாரமும் இன்றி வீட்டில் இருந்து இழுத்துச் சென்று சிறையில் அடைத்தார்கள். ஒவ்வொரு செய்தி சேனலிலும் நான் ஊழல்வாதி என்று அழைக்கப்பட்டபோது என் மனது ரணமானது. ஆனால், நான் ஊழல்வாதி இல்லை, நான் நேர்மையை மட்டுமே சம்பாதித்துள்ளேன் என்பதை இன்று காலம் நிரூபித்துவிட்டது,” என்று உருக்கமாகத் தெரிவித்தார்.
அரசியல் சதி முறியடிப்பு: மேலும் பேசிய அவர், “மத்திய அரசு திட்டமிட்டுத் தொடர்ந்த இந்தச் சதியில் இன்று உண்மை வென்றுள்ளது. கெஜ்ரிவாலும், மணீஷ் சிசோடியாவும் நேர்மையானவர்கள் என்பதை நீதிமன்றம் உறுதி செய்துள்ளது. கடவுள் எங்களோடு இருக்கிறார். இந்தத் தீர்ப்பின் மூலம் நமது அரசியலமைப்புச் சட்டத்தின் மீதும், அதனை வழங்கிய பி.ஆர். அம்பேத்கரின் மீதும் உள்ள நம்பிக்கை மீண்டும் உறுதிப்படுத்தப்பட்டுள்ளது,” என்றார். கெஜ்ரிவாலின் விடுதலையைத் தொடர்ந்து அவரது மனைவி சுனிதா கெஜ்ரிவால் தனது சமூக வலைதளப் பக்கத்தில் “உண்மை எப்போதும் வெல்லும்” என்று பதிவிட்டுள்ளார். இந்தத் தீர்ப்பு மத்திய பாஜக அரசுக்குப் பெரும் பின்னடைவாகக் கருதப்படுகிறது.
